मुंबई: वरळीतील अनधिकृत 'कॅफे सी-फेस' वर हातोडा, 11 वर्षांनंतर महापालिकेची कारवाई

मुंबई- मुंबईत वरळीमध्ये असलेलं 'कॅफे सी-फेस'वर अखेर महापालिकेने हातोडा चालवला. महापालिकेने तब्बल 11 वर्षांनी या हॉटेलच्या अनधिकृत बांधकामांविरोधात कारवाई केली. न्यायालयाने तोडकामाला स्थगिती देण्याचे आदेश रद्द केल्यानंतर शनिवारी संध्याकाळी सहा वाजताच्या सुमारास कारवाई करण्यात आली. 2007 पासून राजकीय आणि इतर क्षेत्रातील वरदहस्तामुळे हे अनधिकृत हॉटेल सुरु होते.

वरळी परिसरातल्या खान अब्दुल गफ्फार खान मार्गावर वरळी सी-फेसच्या सुरुवातीलाच असलेल्या सुमारे दोन हजार चौरस फुटांच्या जागेत 2007 मध्ये एक अनधिकृत बांधकाम करण्यात आलं होते या जागेत कॅफे सी-फेस (हॉटेल तवा) हे रेस्टाॅरंट होते. या उपहारगृहाचा तळमजला साधारणपणे दोन हजार चौरस फूट, तर पहिला मजला हा सुमारे एक हजार 500 चौरस फूट होता.