सीबीआयने पैसे देऊन उभा केला साक्षीदार; पोलिस अधिकाऱ्यानेच पुरवले रिव्हॉल्व्हर्स?

सीबीआयने कोल्हापूरच्या संजय साडविलकर या व्यक्तीला प्रमुख साक्षीदार म्हणून पुढे केले आहे. हा साक्षीदार चांदीचा व्यापारी असून त्याने कोल्हापूरच्या महालक्ष्मी मंदिराच्या चांदीच्या रथकामात मोठा भ्रष्टाचार केल्याचा आरोप सनातनच्या अभय वर्तक यांनी केला. तर हिंदू विधिज्ञ परिषदेचे अॅड. संजीव पुनाळेकर म्हणाले, या भ्रष्टाचाराचा सनातन संस्थेने पाठपुरावा केल्यानंतर आपण तुरुंगात जाऊ अशी भीती साडविलकरला वाटू लागल्यानेच त्याने संस्थेची बदनामी करण्यासाठी खोटे जबाब दिले आहेत. तसेच तावडेंच्या कोल्हापूरमधील वास्तव्यात असलेल्या ओळखीचा फायदा घेत साडविलकरने त्यांनाही गोवल्याचेही पुनाळेकर म्हणाले.
आशिषखेतान यांचा तपासात हस्तक्षेप :सीबीआयच्या तपासाबद्दल प्रश्न उपस्थित करताना सनातनचे प्रवक्ते वर्तक यांनी पूर्वाश्रमीचे पत्रकार आणि सध्या आम आदमी पार्टीचे सदस्य असलेल्या आशिष खेतान यांच्यावरही आरोप केले. सीबीआय आपल्या तपासाबद्दल पोलीसांनाही माहिती देत नसताना सीबीआयच्या प्रत्येक हालचालीची आणि तपासातील गोपनीय दस्तएेवजांची माहिती खेतान यांना अगोदरच कशी मिळते, असा सवालही त्यांनी केला. एका इंग्रजी नियतकालिकासाठी दाभोलकर हत्याप्रकरणाचा पाठपुरावा करत असताना खेतान यांनी पुण्याचे तत्कालीन पोलिस अायुक्त गुलाबराव पोळ यांच्या प्लँचेट प्रकरणाचे स्टींग केले होते. एका निवृत्त पोलीस कर्मचाऱ्यामार्फत प्लँचेट करत पोळ यांनी दाभोलकर यांचा आत्म्याकडूनच माहिती मिळवण्याचा प्रयत्न केला होता.

तावडेच्या कॉल डिटेल्सच्या आधारे सीबीआयने तपास केला असून दाभोलकर यांच्या हत्येच्या काही दिवस अगोदर एक पोलिस अधिकारीच तावडेंच्या संपर्कात असल्याचा तपास पथकाला संशय आहे. या अधिकाऱ्यानेच तावडेला दोन रिव्हॉल्व्हर्स पुरवली असावीत, असा सीबीआयच्या अधिकाऱ्यांना संशय असून त्या दिशेने तपास केला जात असल्याची माहिती सीबीआयमधील सूत्रांनी दिली.
(Pls Note- तुम्ही जर मोबाईलवर ही बातमी वाचत असाल तर फोटोच्या वरच्या बाजूला असलेल्या Whatsapp आणि Facebook च्या आयकॉनवर क्लिक करुन इतरांनाही सहज शेअर करा. तुम्ही जर लॅपटॉप, कॉम्प्युटरवर वाचत असाल तर फोटोच्या वर दिलेले ऑप्शन्स शेअरींगसाठी वापरा. धन्यवाद.)