विधानपरिषदेत मुंडे विरुद्ध मुंडे; धनंजय, पंकजा यांचे वाक् युद्ध रंगले

विधान परिषदेतील विरोधी पक्ष नेते धंजजय मुंडे यांनी राज्याच्या महिला व बालविकास मंत्री पंकजा मुंडे यांच्या कारभारावर गुरुवारी घणाघाती टीका केली. चिक्की, आयुर्वेदिक बिस्किटे, वॉटर प्युरिफायर, चटया, ताटे यांच्या खरेदीमध्ये मोठा गैरकारभार असून, यामध्ये मोठा भ्रष्टाचार झाला असल्याचा आरोप त्‍यांनी विधान परिषदेत केला. शिवाय पंकजा मुंडे यांच्‍या राजीराम्‍याची मागणीही केली. धंनजय म्‍हणाले, ‘‘ पाणी पाजणे हे पुण्याच काम; पण चिक्‍कीबरोबरच बिस्किट आणि वॉटर फिल्टरसाठी दरकरारातही मोठा घोटाळा झाला. वॉटर फिल्टरचा दरकरार होण्यापूर्वीच ऑर्डर देण्यात आली. शिवाय ज्‍या गोवर्धन आयुर्वेदिक फार्माला बिस्किट देण्‍याचा कंत्राट देण्‍यात आला तिला बिस्किट तयार करणाची परवानगीच नाही. तसेच सहा वर्षांपासून बंद असलेल्‍या नागपूरच्‍या वैद्य कंपनीला नऊ कोटी रुपयांच्‍या ताटांचे कंत्राट दिले’’, याची चौकशी झालीच पाहिजे, अशी मागणी त्‍यांनी केली. शिवाय चिक्की प्रकरणात संबंधित विभागाच्या अधिका-यांनी आणि मंत्र्यांनी चिक्की चांगली असल्याचे रिपोर्ट दिले होते. ते सर्व मॅनेज होते, असा आरोपही त्‍यांनी केला.

धनंजय मुंडे म्‍हणाले, घोटाळा करणा-यांसोबत माझे रक्‍ताचे नाते आहे. ते नात्‍याच्‍या ठिकाणी; पण राजकारणही राजकारणाच्‍या ठिकाणी आहे. त्‍यामुळे चिक्‍की घोटाळा प्रकरणी कारवाई झालीच पाहिजे, असेही धनंजय मुुंडे म्‍हणाले.