दाभोलकर हत्या: सीबीआयने तावडेविरुद्ध फास आवळला; 3 तास कसून चौकशी

मुंबई- डॉ. दाभोलकर यांच्या हत्येची योजना आकाराला येत असताना वीरेंद्रसिंह तावडे ज्या मोजक्या लोकांच्या संपर्कात होता, त्यापैकी एका व्यक्तीची मदत सीबीआय या तपासात घेत आहे. गेले दोन दिवस सीबीआयच्या चौकशी पथकामार्फत तावडे आणि त्या व्यक्तीची समोरासमोर चौकशी सुरू आहे. ही व्यक्ती सध्या या प्रकरणातील सीबीआयची मुख्य साक्षीदार असून त्याने दिलेल्या माहितीच्या आधारावरच सीबीआयने तावडेविरुद्ध फास आवळला आहे. तावडे चौकशीत पुरेसे सहकार्य करत नसल्याने सीबीआयने या प्रमुख साक्षीदारालाच समोर बसवून उलटतपासणीला सुरुवात केली आहे.

मिरज दंगलीतही हात? : मंगळवार आणि बुधवार असे दोन दिवस चाललेल्या या उलटतपासणीतून दाभोलकर आणि पानसरे हत्या प्रकरण आणि २००९ सालच्या मडगाव बॉम्बस्फोट प्रकरणासह एकूणच आरोपींच्या कार्यपद्धतीवर प्रकाश पडला असून त्यामुळे हत्येच्या कटातील अनेक दुवे समोर आल्याची माहिती सीबीआयच्या एका वरिष्ठ अधिकाऱ्याने दिली. तसेच या उलटतपासणीद्वारे मिळालेल्या माहितीमुळे सन २००९ मधील मिरज दंगलीमागेही याच गटाचा हात असल्याचा सीबीआयचा संशय बळावला आहे.

सीबीआयचा खबऱ्या व या प्रकरणातील प्रमुख साक्षीदार असलेली ही व्यक्ती विश्व हिंदू परिषद व बजरंग दल सारख्या संघटनेत होती. याच काळात तावडे पश्चिम महाराष्ट्रात हिंदू जनजागृती समितीचे काम करत असताना २००१ पासून या दोघांचा संपर्क आला. हत्येच्या कटासाठी पिस्तुलांचा बंदोबस्त करण्याच्या प्रक्रियेत तावडेने या व्यक्तीशी बऱ्याचदा संपर्क साधला होता. आपल्या काही साधकांना काही दिवस आपल्या घरात आश्रय देण्याची गळही तावडेने या व्यक्तीला घातली होती.

औरंगाबादेत "सनातन'च्या कार्यकर्त्यांवर पोलिसांची नजर