आपल्या शहरातील ताज्या बातम्या आणि ई-पेपर मिळवा मोफत

डाउनलोड करा
  • Marathi News
  • Kamlesh Singh's Pinch On Black Hair Of Our Leaders

तुम्हाला माहित आहे या नेत्यांचे केस पांढरे का नाहीत ?

9 वर्षांपूर्वी
  • कॉपी लिंक

काळजाचा रंग केसातून व्यक्त होणे आवश्यक नसते. आमच्या नेतेमंडळींचे काळीज साफ आहे, पवित्र आहे. ते विशाल आहे, तरुण आहे. पण जे पुरुष आहेत, त्यांच्या काळजाचे नेमके वय त्यांची प्रियतमाही सांगू शकत नाही. विज्ञानानुसार केस म्हणजे मृत पेशींचा समूह असतात. पण तरीही ते जिवंत लोकांच्या वयाचा दाखला बनून मिरवत असतात. नेता हा तरुणच असावा असे गांधीजींनी म्हटले नव्हते. कारण त्यांनी केसांना फार आधीच निरोप दिला होता. म्हणून त्यांच्या केसालाही धक्का लागला नाही. पण ज्यांच्या डोक्यावर केस आहेत, त्यांच्या भावना फक्त तेच समजू शकतात.

केस काळे असतील, घनदाट असतील तर अधिक चांगले असेही नाही. प्रत्येक निवडणुकीगणिक राहुल गांधी बालंबाल बचावतात. अनुभवी नसल्याची टीका सतत होत असल्याने ते कधी केसांना कलप करत नाहीत. एखाद-दुसरा पांढरा केस राजकारणात अनुभव प्रमाणपत्राची भूमिका बजावतो. त्यांच्या आजी माजी पंतप्रधान इंदिरा गांधींनी केसांचा अनोखा ताळमेळ बसवला होता. त्या केसांना कलपही करत आणि एक बट तशीच ठेवत. स्टाइल स्टेटमेंट आणि अनुभवाचे प्रमाणपत्र. अद्याप पूर्ण संमती मिळालेली नाही, पण बहुमत या बाजूचे आहे की, शुभ्रतेची चमक फक्त कपड्यांपुरतीच मर्यादित राहिलेली चांगली, केसांची केसच वेगळी आहे.