आपल्या शहरातील ताज्या बातम्या आणि ई-पेपर मिळवा मोफत

डाउनलोड करा

ज्येष्ठ गायिका कृष्णा कल्ले यांना गानसम्राज्ञी लता मंगेशकर पुरस्कार जाहीर

7 वर्षांपूर्वी
  • कॉपी लिंक
मुंबई- महाराष्ट्र शासनाच्या सांस्कृतिक कार्य विभागाच्यावतीने 2013- 14 या वर्षासाठी देण्यात येणारा गानसम्राज्ञी लता मंगेशकर जीवनगौरव पुरस्कार ज्येष्ठ गायिका कृष्णा कल्ले यांना जाहीर करण्यात आला आहे. पाच लाख रुपये रोख, मानचिन्ह, मानपत्र, शाल आणि श्रीफळ असे पुरस्काराचे स्वरुप आहे.
संगीत आणि गायन क्षेत्रात प्रदीर्घ सेवा केलेल्या ज्येष्ठ कलाकारास हा पुरस्कार देण्यात येतो. यापूर्वी माणिक वर्मा, श्रीनिवास खळे, गजानन वाटवे, दत्ता डावजेकर, पं.जितेंद्र अभिषेकी, पं.हृदयनाथ मंगेशकर, ज्योत्सना भोळे, आशा भोसले, अनिल विश्वास, सुधीर फडके, रवींद्र जैन, प्यारेलाल शर्मा, मन्ना डे, सेहल भाटकर, जयमाला शिलेदार, खय्याम, महेंद्र कपूर, सुमन कल्याणपूर, सुलोचना चव्हाण, यशवंत देव, आनंदजी शाह, अशोक पत्की यांना या पुरस्काराने सन्मानित करण्यात आले आहे.
श्रीमती कल्ले यांनी 1960 पासून आकाशवाणीवर ‘अ’ श्रेणी गायिका म्हणून काम केले. 200 हिंदी तर 100 मराठी चित्रपटगितांना त्यांनी आवाज दिला. त्यांनी 100 पेक्षा अधिक भजने, भक्तीगीते व गजला गायल्या आहेत. त्यांना पंतप्रधान स्व.जवाहरलाल नेहरु यांच्या हस्ते युथ फेस्टीवल पुरस्कार तर राष्ट्रपती स्व.डॉ.राजेंद्र प्रसाद यांच्या हस्ते 1957 मध्ये गायनासाठी पुरस्कार प्रदान करण्यात आला. 1958 मध्ये अखिल भारतीय सुगम संगीताचे पहिले पारितोषिक, सेहगल मेमोरीयलतर्फे देण्यात येणारा गोल्डन व्हॉईस पुरस्कार, पी.सावळाराम प्रतिष्ठान आणि ठाणे महानगरपालिकेतर्फे देण्यात येणारा ‘गंगा जमुना पुरस्कार’ अशा अनेक पुरस्कारांनी त्यांचा सन्मान करण्यात आला आहे.
भिमाभाऊ सांगवीकर यांना विठाबाई नारायणगावकर पुरस्कार- विठाबाई नारायणगावकर जीवनगौरव पुरस्कार धुळे जिल्ह्यातल्या शिरपुर तालुक्यातील ज्येष्ठ तमाशा कलावंत भिमराव तोताराम गोपाळ उर्फ भिमाभाऊ सांगवीकर यांना जाहीर करण्यात आला आहे. पाच लाख रुपये रोख, मानचिन्ह, मानपत्र, शाल आणि श्रीफळ असे पुरस्काराचे स्वरुप आहे. तमाशा क्षेत्रात प्रदीर्घ सेवा केलेल्या ज्येष्ठ कलाकारास हा पुरस्कार देण्यात येतो. यापूर्वी कांताबाई सातारकर, वसंत अवसरीकर, सुलोचना नलावडे, हरिभाऊ बडे, मंगल बनसोडे, साधु रामा पाटसुते, अंकुश संभाजी खाडे उर्फ बाळू, प्रभा शिवणेकर यांना या पुरस्काराने सन्मानित करण्यात आले आहे.
सांगवीकर भिका भिमा सांगवीकर लोकनाट्य तमाशा मंडळाच्या माध्यमातून लोककलेचा वारसा पुढे नेत आहेत. गेली 42 वर्षे त्यांनी तमाशा लोककलेला पुढे नेण्याचे कार्य केले आहे. सामाजिक बांधीलकीतून त्यांनी शाळा आणि देवस्थानांच्या इमारतींसाठी मदत देण्याचे कार्य केले आहे.