शिवेसेनेचा बेरंग,\'पद नसलेल्यांकडे सर्वाधिकार\'; एका नार्वेकरांची दुस-या नार्वेकरांवर टीका

मुंबई - विधानपरिषदेच्या निवडणूुकीतून माघार घेऊन चर्चेत आलेले शिवसेना आणि युवासेनेचे प्रवक्ते राहुल नार्वेकर यांनी धुलिवंदनाच्या दिवशी शिवसेनेला 'जय महाराष्ट्र' करीत राष्ट्रवादी काँग्रेसमध्ये प्रवेश केला आहे. राष्ट्रवादी काँग्रेसचे नेते आणि उपमुख्यमंत्री अजित पवार यांच्या उपस्थितीत राष्ट्रवादी भवनामध्ये त्यांनी पक्षात प्रवेश केला. त्याच वेळी पवार यांनी नार्वेकर यांना मावळमधून लोकसभेची उमेदवारी देण्यात येत असल्याचे जाहीर केले.

शिवसेना सोडण्याचा निर्णय त्रासदायक असल्याचे राहुल नार्वेकर म्हणाले. जेव्हा पक्षात घुसमट होेते, अंतर्गत राजकारणाचे बळी ठरतो तेव्हा पक्ष सोडण्याचा निर्णय घ्यावा लागतो, असे सांगत त्यांनी शिवसेना नेतृत्वावर हल्ला केला. त्यांच्या पक्ष प्रवेशावेळी शिवसेनेच्या काही कार्यकर्त्यांनी राष्ट्रवादी भवनाबाहेर निदर्शने केली. नार्वेकरांच्या विरोधात त्यांनी जोरदार घोषणाबाजी केली. पोलिसांनी त्यांना ताब्यात घेतले आहे.