मुंबईत महिला अटेंडंटकडून 6 वर्षांच्‍या मुलाचे लैंगिक शोषण

मुंबईतील एका नामांकित शाळेच्‍या महिला अटेंडंटवर एका 6 वर्षीय मुलाचे लैंगिक शोषण केल्‍याचा खळबळजनक आरोप करण्‍यात आला आहे. शाळेच्‍या एका विद्यार्थ्‍याचे तिने शोषण केल्‍याचा आरोप संबंधित विद्यार्थ्‍याच्‍या पालकांनी केला आहे. परंतु, शाळेने याप्रकरणाची दखल घेतली नाही. तसेच चौकशी करण्‍यासही नकार दिला आहे.

प्राप्त माहितीनुसार, पीडित मुलगा घाटकोपर येथे राहणारा आहे. कुर्ल्‍यातील एका शाळेत तो शिकतो. स्‍कूल बसमध्‍ये तैनात महिला अटेंडंट त्‍याचे लैंगिक शोषण करायची. तसेच तिच्‍या मित्रांकडेही त्‍याला नेत होती. तेदेखील त्‍याचे शोषण करायचे, असा आरोप त्‍याच्‍या पालकांनी केला आहे.

शाळेच्‍या व्‍यवस्‍थापनाचा पालकांच्‍या आरोपांवर विश्‍वास नाही. व्‍यवस्‍थापनाने चौकशीस नकार दिला असून पोलिसच तपास करतील, असा पावित्रा घेतला आहे.