758 शाळांना जोडणार पाचवी, आठवीचे वर्ग

जिल्हा परिषदेच्या 758 शाळांमध्ये पहिली ते चौथीला इयत्ता पाचवी आणि पाचवी ते सातवीला इयत्ता आठवीची तुकडी जोडण्याचे प्रस्तावित आहे. दरम्यान, या निर्णयामुळे ग्रामीण भागात असलेल्या खासगी शाळांमधील विद्यार्थ्यांच्या संख्येवर परिणाम होणार आहे.

मोफत व सक्तीच्या शिक्षण हक्क कायद्यान्वये प्राथमिक शिक्षणाचे निकष बदलण्यात आले आहेत. त्यामुळे शिक्षण धोरणात अनेक बदल झाले आहेत. त्यानुसार आता इयत्ता पहिली ते पाचवीपर्यंत प्राथमिक आणि सहावी ते आठवीपर्यंतच्या शिक्षणाला उच्च प्राथमिकचा दर्जा देण्यात आला आहे. या निर्णयानुसार आता पहिली ते चौथीपर्यंत वर्ग असलेल्या शाळांना पाचवीचा, तर इयत्ता पाचवी ते सातवीपर्यंतच्या शाळेला आठवीचा वर्ग जोडण्यात येणार आहे. त्यामुळे जिल्हा परिषदेच्या मराठी माध्यमाच्या इयत्ता पहिली ते चौथीपर्यंत वर्ग असलेल्या 639 शाळांना पाचवीचा वर्ग, तर इयत्ता पाचवी ते सहावीच्या 119 शाळांना आठवीचा वर्ग जोडण्यात येणार आहे. प्राथमिक शिक्षण विभागाने तसा अहवालदेखील तयार केला आहे. तसेच उर्दू माध्यम असलेल्या पूर्व प्राथमिकच्या 18 शाळांना पाचवीचा वर्ग जोडण्याचे प्रस्तावित आहे.