एमआयडीसीत जबरी लुटीतील तिघांना अटक

जळगाव - एमआयडीसीमधील पंढरपूरनगरातील सुनील बाबुलाल विश्वे यांना मारहाण करून मोबाइल आणि पगाराचे दोन हजार रुपये लुटल्याची घटना रविवारी रात्री 11.15 वाजता एमआयडीसीच्या एम सेक्टर येथे घडली होती. विश्वे यांना लुटणार्‍या तीन चोरट्यांना एमआयडीसी पोलिसांनी मंगळवारी रात्री अटक केली. अमोल राजेंद्र सोनार, अतुल नथ्थू पाटील आणि वासुदेव सोपान टोंगळे (तिघे रा.अयोध्यानगर परिसरातील कौतिकनगर) अशी चोरट्यांची नावे आहेत.

तिघा आरोपीकडून पोलिसांनी चोरीस गेलेला मोबाइल, 1300 रुपये आणि एक हीरोहोंडा मोटारसायकल (एमएच- 19, बीएन- 080) हस्तगत केली आहे. उर्वरित पैसे तसेच त्यांचे कोणी आजून साथीदार आहेत का? याचा तपास घेणे बाकी आहे. बुधवारी तिघांना न्यायाधीश एस.बी.ठाकूर यांच्या न्यायालयात हजर केले असता तिघांना चार दिवसांची पोलिस कोठडी सुनावण्यात आली आहे. सरकार पक्षातर्फे अ‍ॅड. एम.एस.फुलपगारे तर आरोपींतर्फे अ‍ॅड. राशीद पिंजारी यांनी काम पाहिले.

कापड दुकानातून ड्रेसची चोरी
फुले मार्केट येथील शीतल कलेक्शनमधून डेÑसची चोरी झाल्याची घटना बुधवारी दुपारी 11.30 वाजता घडली. अकोला येथील फातेमाबी सय्यद नाजीर, रिहानाबी सय्यद निजाम आणि रजियाबी नासिर खान या तिघी महिला अनारकली पंजाबी सूट खरेदी करण्यासाठी दुकानात गेल्या होत्या. ड्रेस पाहत असताना त्यांनी एक ड्रेस चोरी केला. दुकानमालक मनोहर गोपीचंद नाथाणी यांनी दिलेल्या फिर्यादीवरून शहर पोलिस ठाण्यात तिघांविरोधात चोरीचा गुन्हा दाखल करण्यात आला आहे. पोलिस उप निरीक्षक शिवाजी नागवे तपास करीत आहेत.