आपल्या शहरातील ताज्या बातम्या आणि ई-पेपर मिळवा मोफत

डाउनलोड करा

LIVE रिपोर्ट : भ्रष्टाचाराने गिळली होती धरणाची साठवण क्षमता

8 वर्षांपूर्वी
  • कॉपी लिंक

नाशिक - चांदवड-देवळा विधानसभा मतदारसंघ व जिल्हा परिषदेच्या उमराणा गटातील चिंचवे धरणात 66 दशलक्ष घनफूट पाणी साचणे अपेक्षित असताना प्रत्यक्षात मात्र 38 दशलक्ष घनफूट पाणीच साचत होते. भ्रष्टाचाराने अध्र्या धरणाची साठवणूक क्षमता गिळाल्याचे लक्षात आल्यानंतर गेल्यावर्षी थेट पावसाळी अधिवेशनात आमदार शिरीष कोतवालांनी आवाज उठवल्यावर कारवाईचे चक्रे फिरली. मात्र, अधिकार्‍यांच्या निलंबनानंतर धरणाची स्थिती सुधारण्यासाठी ठोस प्रयत्न झाले नसल्याचे गावकर्‍यांचे म्हणणे आहे.

चिंचवे धरणाच्या कामातील भ्रष्टाचाराचा मुद्दा आठ वर्षांपासून गाजत आहे. 2004 मध्ये काम पूर्ण झाल्यावर क्षमतेइतके पाणी साचत नसल्याचे लक्षात आले. 2006 पर्यंत प्रत्येक पावसाळ्यात डोळ्यांसमोर पाणी वाहून गेले. तलावात 50 टक्केच पाणी साठत असल्यामुळे भ्रष्टाचाराचा पाझर कोठे झाला याचा शोध सुरू झाला. गेल्या पावसाळी अधिवेशनात दुष्काळावर चर्चा सुरू झाल्यानंतर कोतवाल यांनी चिंचवेतील भ्रष्टाचारावर प्रश्न उपस्थित केला. या चर्चेत जलसंधारण राज्यमंत्री डॉ. नितीन राऊत यांनी प्रकल्पातील भ्रष्टाचार व अनियमिततेची कबुलीच दिली होती. गाळामुळे पाणी साठवणूक क्षमता कमी होत असेल, अशी शक्यता व्यक्त करतानाच प्रत्यक्ष पाणी मोजणी केल्यावरच अनियमिततेची तीव्रता किती असेल, याचे निदान होईल, असेही त्यांनी स्पष्ट केले होते.

दीड वर्षापूर्वी दिले चौकशीचे आदेश
3 फेब्रुवारी 2012 पासून चिंचवेतील भ्रष्टाचाराची चौकशी सुरू झाली. संयुक्त पाहणीद्वारे धरणातील त्रुटी दूर करण्याचे आदेश जलसंधारणमंत्र्यांनी दिले होते. संयुक्त पाहणी व उपाययोजनांची कारवाई 2012 मध्येच पूर्ण करणे अपेक्षित होते. प्रत्यक्षात मात्र 2013 सुरू झाल्यानंतरही पाहणीची ही शासकीय प्रक्रिया सुरूच होती.

धरणाचे गेटही खचले होते
धरणाच्या सांडवा क्रमांक 436 व 855 मधून पाण्याचा पाझर होत होता. भराव योग्य पद्धतीने दाबला गेला नसल्याचेही जलसंधारण मंत्र्यांनी मान्य केले होते. धरणाच्या विमोचकाचे पाइप व गेट खचलेले होते. परिणामी पाणी सोडण्याची प्रक्रियाही नीट करता येत नव्हती. मुळात प्रकल्पाचे संकल्पचित्र वा रचनेप्रमाणे पूर कालवा, सांडव्याचे झालेलेच नव्हते.