कोथरूडमध्ये आठ दुचाकी जाळल्या, महिन्याभरातील पुण्यातील चौथी घटना

पुणे- पुण्यातील कोथरुड परिसरातील किष्किंदानगरमध्ये पार्किंग करण्यात आलेल्या आठ दुचाकी आज पहाटे अज्ञातांनी जळाल्याची घटना उघडकीस आली आहे. पहाटे 2 च्या सुमारास ही घटना घडली. या घटनेत सर्व वाहने जळून खाक झाली आहेत. दरम्यान, पुण्यात वाहने जाळल्याची गेल्या महिन्याभरातील ही चौथी घटना आहे. ही वाहने नेमके कोण पेटवतेय यामुळे नागरिक भयभीत झाले आहेत तर पोलिस प्रशासन हतबल झाले आहे.

मंगळवारी रात्री नेहमीप्रमाणे कोथरूडमधील किष्किंदानगर परिसरात पार्किंगमध्‍ये वाहने लावली होती. मात्र, मध्यरात्री दोनच्या सुमारास तेथून धूर येऊ लागला. काही वेळातच आगीने रूद्र रूप धारण केले त्यामुळे रहिवाशांत एकच गोंधळ उडाला. रहिवाश्यांनी आग विझवण्‍याचा प्रयत्‍न केला. मात्र तोपर्यंत सर्व दुचाकी जळून खाक झाल्या.

नागरिकांनी हा प्रकार पोलिसांना कळवला. त्यानंतर कोथरूडचे पोलिस घटनास्थळी दाखल झाले. मात्र, या आगीप्रकरणी अद्याप धागेदोरे लागले नाहीत. याप्रकरणी कोथरुड पोलिस ठाण्यात अज्ञात व्यक्तींविरोधात गुन्हा दाखल केला गेला आहे.