आम्ही अग्निपरीक्षा देऊच; पण तुमचेही बुरखे फाडू; मुख्यमंत्र्यांचा सज्जड इशारा

पुणे- “खोटा प्रचार करून भाजपच्या बदनामीची मोहीम विरोधकांनी चालवली आहे; पण कार्यकर्त्यांनी अतिशय ताकदीने काँग्रेस-राष्ट्रवादीच्या नेत्यांची गावोगावची प्रकरणे खणून काढावीत. तक्रारी कराव्यात, आम्ही तर अग्निपरीक्षा देऊच पण नैतिकता नसलेल्या ‘काँग्रेस-राष्ट्रवादी’च्या नेत्यांचेही बुरखे फाडल्याशिवाय गप्प बसणार नाही,” असा सज्जड इशारा मुख्यमंत्री देवेंद्र फडणवीस यांनी दिला.

भारतीय जनता पक्षाच्या दोनदिवसीय प्रदेश कार्यकारिणी बैठकीचे उद््घाटन शनिवारी केंद्रीय नगरविकासमंत्री वेंकय्या नायडू यांच्या हस्ते पुण्यात झाले. या वेळी ते बोलत होते. प्रदेशाध्यक्ष रावसाहेब दानवे अध्यक्षस्थानी होते. सुमारे पाऊण तासाच्या जोशपूर्ण भाषणात फडणवीस यांनी मंत्रिमंडळातील सर्व मंत्र्यांवरील आरोप खोडून काढले. ते म्हणाले, “भाजपच्या कार्यकाळात कुठलेही घोटाळे झालेले नाहीत. त्यामुळे जाणीवपूर्वक आपल्या मंत्र्यांना लक्ष्य केले जात आहे. आमच्या मंत्र्यांवर भूखंड लाटल्याचे आरोप करणाऱ्या काँग्रेस-राष्ट्रवादीकडे थोडी जरी नैतिकता शिल्लक असेल तर त्यांनी आजवर लाटलेले सरकारी भूखंड परत करावेत.”

सरकारच्या विरोधात कोणतीही ठोस गोष्ट सापडत नसल्याने गोबेल्स नीतीनुसार हवेत बाण मारले जात आहेत. मात्र, आमचे सरकार प्रामाणिकपणेच काम करेल, असा विश्वास मी जनतेला देऊ इच्छितो. भाजपला निवडून दिल्याचा जनतेला अभिमान वाटेल, अशीच कामगिरी हे सरकार करून दाखवेल. ज्या दिवशी आम्ही भ्रष्टाचार अंगीकारू त्याच दिवशी आम्ही घरी जाऊ, असे मुख्यमंत्री देवेंद्र फडणवीस यांनी या वेळी बोलताना सांगितले. या वेळी पदाधिकारी उपस्थित होते.

व्यासपीठावर मंत्र्यांची गर्दी