माजी आरोग्यमंत्री डॉ. दौलतराव आहेर यांचे निधन

नाशिक- माजी आरोग्यमंत्री व भाजपचे ज्येष्ठ नेते डॉ. दौलतराव आहेर यांचे आज पहाटे अल्पशा आजाराने निधन झाले. ते 74 वर्षाचे होते. 1995 ते 1999 या दरम्यान युती सरकारच्या काळात आहेर यांनी आरोग्यमंत्रीपद संभाळले होते. आज सायंकाळी 5 वाजता त्यांच्यावर देवळा येथे अंत्यसंस्कार करण्यात येतील.

दौलतराव आहेर हे नाशिक लोकसभा मतदारसंघातून 1989 साली लोकसभेवर निवडून गेले होते. पुढे युती सरकारच्या काळात भाजपने त्यांना कॅबिनेटमंत्रीपदाची संधी दिली. युती सरकार पडल्यानंतर आहेर यांनी काही काळ राष्ट्रवादीत प्रवेश केला. राष्ट्रवादीने तापी खोरे महामंडळाचे अध्यक्षपद दिले मात्र तेथेही आहेर फार रमले नाहीत. 2009 साली पुन्हा एकदा त्यांनी भाजपमध्ये प्रवेश केला. 2014 साली झालेल्या विधानसभा निवडणुकीत त्यांचा मुलगा डॉ. राहुल आहेर हे चांदवड-देवळ्याचे भाजपचे आमदार बनले आहेत.