हे तर विरोधकांचे षड‌्यंत्र; मुख्यमंत्र्यांनी दिली खडसेंसह 2 मंत्र्यांना ‘क्लीन चिट’

पुणे- भारतीय जनता पक्षाचे प्रदेशाध्यक्ष रावसाहेब दानवे असोत अथवा माजी महसूलमंत्री एकनाथ खडसे. जलसंपदामंत्री गिरीश महाजन असोत किंवा शिक्षणमंत्री विनोद तावडे आणि ग्रामविकासमंत्री पंकजा मुंडे, या सर्वांवर होत असलेले आरोप हा विरोधकांच्या षड‌्यंत्राचा भाग आहे, असा दावा करून मुख्यमंत्री देवेंद्र फडणवीस यांनी या सर्वच मंत्र्यांना ‘क्लीन चिट’ दिली. या आरोपांत अजिबात तथ्य नसल्याचेही ते म्हणाले.

भाजप प्रदेश कार्यकारिणी बैठकीच्या उद्घाटन सत्रात बाेलताना फडणवीस यांनी आपल्या मंत्र्यांवर होत असलेल्या आरोपांचा समाचार घेतला. ते म्हणाले, विरोधक म्हणून आम्ही आरोप केले तेव्हा आमच्याकडे पुरावे असायचे. एकही आरोप आम्हाला मागे घ्यावा लागला नाही. काँग्रेस-राष्ट्रवादी मात्र मीडियाचा गैरवापर करून गोबेल्स नीतीने अपप्रचार करत आहेत. या वेळी भाजपचे राष्ट्रीय नेते व्यंकय्या नायडू यांनीही एकनाथ खडसे यांचे गुणगान केले. खडसेंनी स्वत:हून राजीनामा देत आदर्श उदाहरण समोर ठेवले असल्याचे सांगून त्यांच्या आरोपातील सत्य जनतेसमोर येईल,असे ते म्हणाले.