शिष्यवृत्तीची कागदपत्रे पडताळणीच्या माेहिमेला जिल्ह्यात सहा महाविद्यालयांनी दिला ‘खो’

अकोला - शिष्यवृत्तीचे अर्ज पडताळणी करण्याच्या समाज कल्याण विभागाच्या मोहिमेला अकोट आणि तेल्हारा तालुक्यातील सहा महाविद्यालयांनी खो दिला आहे. या सर्व महाविद्यालयांना समाज कल्याण विभागाच्या सहायक आयुक्तांनी शो कॉज नोटीस बजावल्या असून सुस्पष्ट स्पष्टीकरण मागविण्यात आले आहे. भारत सरकारची मॅट्रीकोत्तर शिष्यवृत्ती मिळण्यासाठी दरवर्षी लाखो विद्यार्थ्यांमार्फत ऑनलाईन अर्ज भरले जातात. या अर्जात अनावधानाने राहिलेल्या त्रुट्या तपासून त्या विशिष्ट वेळेच्या आत पूर्ण करुन घेण्याची जबाबदारी त्या-त्या महाविद्यालयांची असते. ही जबाबदारी निभावणे सोपे व्हावे म्हणून समाज कल्याण विभागाने शुक्रवारपासून तालुकानिहाय शिबिरे आयोजित केली आहे.