विडी घरकुलमधील तणाव निवळला, पोलिस बंदोबस्त वाढवला

सोलापूर- कुंभारी येथील गोदूताई विडी घरकुलमधील ग्रुप येथे बुधवारी मूर्ती विटंबनेचा प्रकार घडला होता. या प्रकारानंतर या भागात तणाव आहे. गुरुवारी सकाळी दहा वाजण्याच्या सुमारास विडी घरकुल येथील मुख्य चौकात एका जमावाने घोषणाबाजी देत दुकाने बंद केली. त्यामुळे तणाव वाढला. त्यानंतर पोलिसांनी तत्काळ घटनास्थळी पोहोचवून जमाव पांगविला. याठिकाणी पोलिस बंदोबस्त वाढवल्यानंतर तणाव निवळला. गोदूताई विडी घरकुलमधील ग्रुप येथे बुधवारी रात्री आठच्या सुमारास मूर्ती विटंबनेचा प्रकार घडला होता. त्यानंतर या भागात तणाव निर्माण झाला होता. दोषींना आठ दिवसांत अटक करण्याचे आश्वासन पोलिसांनी दिल्यानंतर प्रकरण शांत झाले. या प्रकरणी बुधवारी रात्री अज्ञात व्यक्तीवर गुन्हा दाखल करण्यात आला आहे.