आप महिला आमदाराचा आरोप - भाजपमध्ये प्रवेश करत नाही म्हणून धमकी

नवी दिल्ली - दिल्लीचे माजी मुख्यमंत्री अरविंद केजरीवाल यांच्या आम आदमी पार्टीकडून पुन्हा एकदा भारतीय जनता पक्षावर (भाजप) घोडेबाजारीचा आरोप करण्यात आला आहे. एवढेच नाही तर, पक्षाच्या एका आमदाराचे म्हणणे आहे, की भाजपमध्ये प्रवेश करण्यास नकार दिल्यानंतर धमकी देखील देण्यात आली. केजरीवाल यांनी यासंदर्भात भाजपाध्यक्ष राजनाथसिंह यांना पत्र लिहिले आहे. केजरीवाल यांच्या नेतृत्वात आज (गुरुवार) सायंकाळी 6.30 वाजता त्यांच्या पक्षाचे 27 आमदार राष्ट्रपती प्रणव मुखर्जी यांची भेट घेणार आहेत. ते राष्ट्रपतींना दिल्ली विधानसभा भंग करुन निवडणूक घेण्याची मागणी करणार आहेत. तसेच भाजपच्या कथित घोडेबाजारीबद्दलही सांगणार आहेत.

महिला आमदाराचा आरोप
दिल्लीतील शालीमार येथील आमदार वंदना कुमारी यांनी सध्या भाजपमध्ये काम करत असलेल्या पूर्वाश्रमीच्या 'आप'च्या कार्यकर्त्यावर धमकावल्याचा आरोप केला आहे. आमदार वंदना कुमारी यांचा आरोप आहे, की तो कार्यकर्ता त्यांच्या कार्यालयात आला आणि त्याने वंदना कुमारी यांना भाजपमध्ये प्रवेश करण्याचा आग्रह केला. त्यांनी त्याला नकार दिल्यानंतर त्याने या भेटीबद्दल कुठेही वाच्यता न करण्याचे बजावले. या भेटीबद्दल बाहेर बोलल्यास तुमच्या कुटुंबाला त्याचे परिणाम भोगावे लागतील असे धमकावले. त्यानंतर वंदना कुमारी यांनी पोलिस स्टेशन गाठले.

केजरीवालांचे राजनाथसिंहाना पत्र
अरविंद केजरीवाल यांनी केंद्रीय गृहमंत्री आणि भाजपाध्यक्ष राजनाथसिंह यांना पत्र लिहिले आहे. त्यात त्यांनी म्हटले, 'भाजपचे कार्यकर्ते आपच्या आमदारांना विकत घेण्याचा प्रयत्न करीत आहेत. हे लोकशाहीला घातक आहे. जर तुम्हाला निवडणूका हव्या असतील तर, माझी मागणी आहे, की तुम्ही नायब राज्यपाल नजीब जंग यांना लवकर प्रक्रिया सुरु करण्यास सांगावे. 4 जुलैला भाजपने सुप्रीम कोर्टात आपली बाजू स्पष्ट करावी.'
(संग्रहित छायाचित्र - आप नेते अरविंद केजरीवाल )