शत्रुघ्न सिन्हांनी केली केजरीवालांची प्रशंसा तर ममता म्हणाल्या-AAPला करा मतदान

(फाइल फोटो: शत्रुघ्न सिन्हा आणि ममता बनर्जी)

नवी दिल्ली- दिल्ली विधानसभा निवडणुकीच्या प्रचारतोफा आज (गुरुवारी) सायंकाळी थंडावल्या. दिल्लीत 7 फेब्रुवारीला मतदान होणार आहे. मात्र, मतदानापूर्वी दिल्लीतील बदलते चित्र पाहून भाजपची झोप उडाली आहे. त्यात बॉलिवूड अभिनेते आणि भाजपचे नेते शत्रुघ्न सिन्हा यांना 'आप'चे संयोजक अरविंद केजरीवाल यांची प्रशंसा करून आपल्या पक्षाला जोरदार झटका दिला आहे. दुसरीकडे, पश्चिम बंगालच्या मुख्यमंत्री ममता बॅनर्जी यांनी दिल्लीकरांना 'आप'ला मतदान करण्याचे आवाहन केले आहे.

शत्रुघ्न सिन्हा यांनी अरविंद केजरीवाल यांनी एक प्रामाणिक व्यक्ती म्हणून संबोधित केले आहे. तसेच आम आदमी पक्ष (आप) भाजपला तगडे आव्हान देत असल्याचे म्हटले आहे. शत्रुघ्न सिन्हा एका वृत्तवाहिनीशी संवाद साधत होते.

दुसरीकडे, तृणमुल कॉंग्रेसच्या नेत्या ममता बनर्जी गुरुवारी भाजपविरोधात मैदानात उतरल्या. ममतांनी 'टि्वटर'च्या माध्यमातून सर्व दिल्लीकरांना 'आप'ला मतदान करण्याचे आवाहन केले आहे. 'राजधानीचा विकास ही देशाला गरज असून दिल्लीतील सर्व मतदारांनी आम आदमी पक्षाच्या (आप) उमदेवारांना मतदान करून विजयी करावे', अशी पोस्ट ममता बॅनर्जी यांनी केली आहे.

यापूर्वी बिहारमधील जदयूने देखील केजरीवाल यांच्यासाठी प्रचार करणार असल्याचे म्हटले होते. कोट्यवधींच्या देणगीप्रकरणी संशयाच्या भोवर्‍यात सापडलेल्या 'आप'च्या बचावासाठी खुद्द नीतीशकुमार धावून आले होते.

एका वृत्तवाहिनीशी संवाद साधताना शत्रुघ्न सिन्हा म्हणाले, दिल्लीत 'आप'ला विजयाची संधी आहे म्हणून मला अशा प्रकारचा प्रश्न विचारण्यात आला आहे. मात्र, भाजपने किरण बेदी यांना मुख्यमंत्रीपदाचा उमेदवाराच्या रुपात मैदानात उतरवले आहे. दिल्लीत खरी लढत किरण बेदी आणि अरविंद केजरीवाल यांच्यात होत आहे. दोन्ही प्रामाणिक नेते आहेत.