56 दिवसांच्या सुटीनंतर राहुल मायदेशी, \'थाई एयरवेज\'ने दिल्लीत आगमन

6 वर्षांपूर्वी

कॉपी लिंक

नवी दिल्ली - काँग्रेस उपाध्यक्ष राहुल गांधी 56 दिवसांची सुटी अटोपून दिल्लीत परतले आहेत. ते बँकॉकवरुन दिल्लीत आले आहेत. गुरुवारी सकाळी जेट एयरवेजच्या विमानातून ते दिल्ली विमानतळावर उतरले. त्यांचे फ्लाइट 10.35 वाजता लँड होणार होते, मात्र काही कारणांमुळे त्याला उशिर झाला. विमानतळावरुन ते थेट 12 तुघलक लेन येथील त्यांच्या निवासस्थानी गेले. तिथे त्यांची आई आणि काँग्रेस अध्यक्षा सोनिया गांधी व बहीण प्रियंका वाट पाहात होत्या.

देशात संसदेच्या अर्थसंकल्पीय अधिवेशनाला सुरुवात झाली आणि राहुल गांधी सुटीवर गेले होते. राहुल यांच्या सुटीवर देशात वेगवेगळ्या प्रकारची चर्चा सुरू होती. माध्यमांमध्ये राहुल गाधी युरोप आणि व्हिएतनाम दौर्‍यावर असल्याच्या बातम्या येत होत्या तर दुसरीकडे राहुल गांधी थायलंडमध्ये सुटी घालवत असून ते विपश्यना करत असल्याचीही चर्चा होती. गुरुवारी थाई जेट एयरवेजच्या विमानाने ते दिल्लीत परतणार ही बातमी आली तेव्हा ते थायलंडमध्ये होते हे नक्की मानले जात आहे.

भारतात परतल्यानंतर पहिले आंदोलन मोदी सरकारच्या भू-संपादनाविरोधात
राहुल गांधी दीर्घ सुटीनंतर दिल्लीत परतले आहेत. आता ते पुन्हा पक्षाच्या कार्यात सक्रीय होणार आहेत. त्यांचे पहिले आंदोलन मोदी सरकाच्या भू-संपादन कायद्याविरोधात असणार आहे. 19 एप्रिल रोजी आयोजित या रॅलीला यशस्वी करण्यासाठी काँग्रेस कार्यकर्त्यांनी कंबर कसली आहे. या रॅलीत लाखोंच्या संख्येने लोक येतील अशी काँग्रेस नेत्यांची योजना आहे. राहुल गांधी यांचे निकटवर्तीय आणि राजस्थान काँग्रेसचे नेते सचिन पायलट, हरियाणाचे दीपेंद्र हुड्डा या दोघांवर या रॅलीची जबाबदारी आहे.

राजस्थानमधून विशेष किसान रेल्वेने लोक रॅलीसाठी दिल्लीला येणार आहेत. यात महिलांसाठी वेगळे कोच असणार आहेत. संपूर्ण रेल्वेला काँग्रेसच्या रंगाने रंगवून टाकले जाणार आहे. रेल्वेवर बॅनर्स, पोस्टर्स आणि काँग्रेसचे झेंडे असणार आहेत. त्यावर एक घोषणा असेल, ‘नरेंद्र मोदी किसान विरोधी’.

भाजप नेते म्हणाले, राजकारणात काहीच पार्ट टाइम नसते
भारतीय जनता पक्षाने काँग्रेस उपाध्यक्ष राहुल गांधी यांच्या सुटीवर काँग्रेसला चिमटा काढत म्हटले आहे, की राजकारणात काहीच पार्ट टाइम नसते. भाजप प्रवक्ते संबित पात्रा म्हणाले, 'पॉलिटिक्समध्ये काहीच पार्ट टाइम नसते. एवढे दिवस एक नेता, एका मतदारसंघाचा खासदार सुटी कशी काय घेऊ शकतो. त्यांना कळाले पाहिजे की आपल्यावर एका लोकसभा मतदारसंघाची जबाबदारी आहे.'
शिवसेनेचे नेते राज्यसभा खासदार संजय राऊत म्हणाले, 'राहुल गांधी मंथन करायला गेले असे सांगितले जात होते. आता देशाला उत्सूकता आहे, की या मंथनातून ते काय घेऊन आले आहेत.'

फोटो - राहुल गांधी यांच्या निवासस्थानाबाहेर काँग्रेस कार्यकर्त्यांनी फटाके फोडून आनंद साजरा केला.

बातम्या आणखी आहेत...