शरद पवारांनी विचारले दाऊद कुठे आहे ? सरकार म्हणाले, आम्हाला माहीत नाही

नवी दिल्ली - अंडरवर्ल्ड डॉन आणि 1993 च्या मुंबई बॉम्बस्फोटातील मुख्य आरोपी दाऊद इब्राहिमचा ठाव ठिकाणा भारत सरकारला माहित नाही. मंगळवारी संसदेत राष्ट्रवादी काँग्रेसचे अध्यक्ष शरद पवार यांनी विचारलेल्या प्रश्नाच्या लेखी उत्तरात केंद्रीय गृह राज्यमंत्री हरिभाई प्रिथाभाई चौधरी यांनी सांगितले, 'दाऊद कुठे आहे याची सरकारला माहिती नाही. जेव्हा त्याचा ठाव ठिकाणा माहित होईल तेव्हा त्याच्या प्रत्यार्पणाची कारवाई सुरु केली जाईल.' विशेष म्हणजे काही दिवसांपूर्वीच दिल्लीचे माजी पोलिस आयुक्त निरज कुमार यांनी दाऊद शरण येण्यास तयार होता, पण तत्कालिन सरकारने शेवटच्या क्षणी माघार घेतली होती.

संसदेत मंत्री महोदयांनी दिली माहिती
अंडरवर्ल्ड डॉन संबंधीच्या प्रश्नावर संसदेत गृह राज्यमंत्र्यांनी माहिती दिली. ते म्हणाले, मोस्ट वाँटेड दाऊद इब्राहिम कासकर सध्या भारतीय तपास यंत्रणेच्या रडारवर नाही. तो कुठे आहे याबद्दल सरकारकडे कोणतीही माहिती नाही. ते म्हणाले, 'जेव्हा त्याचे लोकेशन कळेल तेव्हाच त्याच्या प्रत्यार्पणाची तयारी केली जाईल.' मुंबईत 12 मार्च 1993 रोजी साखळी बॉम्बस्फोट झाले होते. त्यात दाऊद मुख्य आरोपी आहे. मुंबईत 13 ठिकाणी झालेल्या स्फोटांमध्ये 257 लोक ठार आणि 700 जखमी झाले होते.

नीरज कुमार यांच्या कारकिर्दीवर प्रकाश टाकणारे पुस्तक लवकरच प्रकाशित होत आहे. त्या पार्श्वभूमीवर एका वृत्तपत्राला दिलेल्या मुलाखतीत त्यांनी दाऊद‍ इब्राहीमविषयी गौप्यस्फोट केला.