आसाम, नागालॅंडसह ईशान्य भारत हादरला, पीडितांनी लुटले सामग्रीचे ट्रक

नवी दिल्ली/काठमांडू- नेपाळसह आसाम, नागालॅंड आणि ईशान्य भारतातील काही राज्ये भूकंपाच्या धक्क्याने हादरले. मध्यरात्री दीडच्या सुमारास भूकंपाचे धक्के जाणवले. या भूकंपाची तीव्रता रिश्टर स्केलवर 4.7 एवढी नोंदवण्यात आली. सुदैवाने कोणतीही जीवितहानी झाल्याचे अद्याप वृत्त नाही. दुसरीकडे, नेपाळमधील भूकंपात मरण पावणार्‍यां नागरिकांची संख्या 6,200 च्या वर पोहोचली आहे. तब्बल 14 हजार नागरिक जखमी झाले आहेत.

पाऊस आणि खराब हवामानामुळे बचावकार्यात अनेक अडथळे येत आहेत. दरम्यान नेपाळमध्ये एनडीआरएफ आणि लष्कराकडून सुरु असलेल्या बचावकार्याचा आढावा घेण्यासाठी परराष्ट्र सचिव एस.जयशंकर आणि राष्ट्रीय सुरक्षा सल्लागार अजित दोभल काठमांडूला भेट देणार आहेत.

भूकंपग्रस्ताना वेळेवर मदत मिळत नसल्याने ते संतापले आहेत. संतप्त भूकंपग्रस्तांनी रस्त्यावरच खाद्यसामग्रीचे ट्रक लुटल्याची माहिती समोर आली आहे. विध्वंसकारी भूकंपामुळे अनेकांना बेघर व्हावे लागले असून त्यांचे संसार रस्त्यावर आले आहेत. त्यात पुरेशी मदत मिळत नसल्याने सिंधुपाल चौक येथील भूकंपग्रस्त संतापले आहेत. संतप्त भूकंपग्रस्तांनी रस्त्यावरच खाद्य सामग्रीचे ट्रक लुटल्याची घटना समोर आली आहे. गरजू लोकांपर्यंत मदत न पोहोचल्याने त्यांनी हे पाऊल उतरलेले आहे. हजारो टन खाद्यसामग्री एअरपोर्ट आणि मदत शिबिरात अडकून पडली आहे.