करून घेऊया प्रभूची ओळख

राजस्थान आणि गुजरातमधील एक प्रसिद्ध संत श्री दादब भगत यांच्यासंबंधी एक घटना प्रसिद्ध आहे. एका गावात एक माणूस होता. कामात मग्न, पण अभिमानी. त्याला कोणीतरी माहिती दिली की, गावात कोणी महात्मा आलेला आहे. त्याला वाटले जीवनाचा बराच काळ असाच घालवला. अगदी गावातच महात्मा आलेला आहे, तर त्या महात्म्याचे दर्शन घ्यावे. तो घोड्यावर निघाला. रस्त्यावर त्याला एक जण झाडे तोडताना दिसला. त्याला त्याने विचारले की, ‘दादू भगत कुठे असतात?’ झाड तोडणार्‍याने उत्तर न देताच आपले काम चालू ठेवले. त्याने असे एक-दोनदा विचारल्यावरही झाडे तोडणारा त्याच्याकडे लक्ष देत नव्हता. तेव्हा रागाने तो घोड्यावरून उतरला आणि लाथांनी, चाबकाने त्याला बडवले आणि अपशब्द बोलत निघून गेला. पुढे जाऊन परत एका व्यक्तीला ‘दादू भगत कुठे भेटतील’ म्हणून त्याने विचारले. त्या व्यक्तीने उत्तर दिले की, ‘तुम्ही आलात त्या रस्त्याने येणार्‍या-जाणार्‍यांना काही झाडांचा त्रास होत असल्याने दादू भगत ती साफ करीत आहेत.’ हे ऐकून तो भयंकर दु:खी झाला, अजाणतेपणी आपल्याकडून पाप घडल्याचा त्याला पश्चात्ताप झाला. परत येऊन त्याने झाडे तोडणार्‍याच्या रूपात असलेल्या दादू भगतची माफी मागितली.