IND vs SL: टीम इंडियाचा 63 धावांनी पराभव, हेराथने सात जणांना धाडले तंबूत

गाले -तीन सामन्‍यांच्‍या गॉल कसोटी मालिकेतील पहिली कसोटी श्रीलंकेने 63 धावांनी जिंकली आहे. दुस-या डावात 176 धावांचा पाठलाग करताना टीम इंडिया 112 धावांवरच बाद झाली आहे. लंकेच्‍या हेराथने जोरदार गोलंदाजी करत भारताच्‍या 7 विकेट्स मिळवल्‍या. त्‍यामुळे भारताने ही कसोटी हातची गमावली आहे. श्रीलंकेनं भारताला 63 धावांनी हरवून कसोटी मालिकेत 1-0 अशी आघाडी घेतली आहे.

लंकेचा डावखुरा फिरकी गोलंदाज रंगना हेराथ याने टीम इंडियाच्‍या फलंदाजांना पाणी पाजले. लोकेश राहुलच्‍या रूपात भारताला पहिला झटका बसला. 5 धावा बनवून तो LBW आऊट झाला. त्‍यानंतर इशांतही हेराथच्‍या षटकात LBW आऊट झाला. रोहित शर्मा 4 धावा काढून हेराथच्‍या चेंडूने बोल्‍ड झाला. विराट कोहलीही फार काळ टिकला नाही. केवळ 3 धावा काढून तो तंबूत परतला. साहा आणि हरभजनची कामगिरीही ढिम्‍म राहिली. हेरथने तब्बल 7 भारतीय खेळाडूंना परतून लावले. उरलेल्या तीन विकेट कौशलने घेतल्या.