भारताचा विजय, दक्षिण आफ्रिकेने तब्बल नऊ वर्षांनी गमावली विदेशात मालिका

नागपूर- आर. अश्विन व अमित मिश्राच्या भेदक गोलंदाजीच्या जोरावर येथील जामठा मैदानावर भारताने दक्षिण आफ्रिकेचा दणदणीत 124 धावांनी शुक्रवारी पराभव केला. भारतीय संघाने दुसऱ्या डावात 310 धावांचा पाठलाग करण्यासाठी मैदानावर उतरलेल्या आफ्रिकन संघाला 185 धावांवरच रोखले. या विजयासोबत भारताने चार सामन्यांची कसोटी मालिका 2-0 अशा फरकाने खिशात घातली. या बरोबरच आफ्रिकन संघावर तब्बल 9 वर्षांनंतर परदेशात कसोटी मालिकेत पराभूत होण्याची नामुष्की आली.

या मालिकेतील पहिला सामना मोहाली येथे खेळला गेला होतो. हा सामना भारतने जिंकला. तर दुसरा सामना बेंगळुरु येथे पावसामुळे अनिर्णित राहीला होता. आता या मालिकेचा चौथा आणि अंतीम सामना दिल्ली येथील फिरोज शाह कोटला मैदानावर खेळवला जाणार आहे.

नागपूरचे मैदान हे भारत आणि दक्षिण आफ्रिका या दोन्ही संघांच्या फलंदाजांसाठी अक्षरशः कर्दनकाळ ठरले. या मैदानावर दोन दिवसांत तब्बल 40 फलंदाज बाद झाले. पहिल्या दिवशी 12 (10 भारत आणि 2 आफ्रिकेचे), दुसऱ्या दिवशी तब्बल 20 फलंदाज (8 द. आफ्रिका (पहिला डाव), 10 भारत (दुसरा डाव), 2 आफ्रिका (दुसरा डाव) तर तिसऱ्या दिवशी आफ्रिकन संघाचे 8 फलंदाज (दुसरा डाव) बाद झाले.

फॅक्ट
-नागपूर कसोटीच्या दुसऱ्या दिवशी एकूण 20 फलंदाज बाद झाले.
-एका दिवसात सर्वाधिक फलंदाज बाद होण्याचा विक्रम इंग्लंड आणि ऑस्ट्रेलिया यांच्यादरम्यान लॉर्ड्स येथे खेळल्या गेलेल्या कसोटी सामन्यात नोंदवला गेला होता.
-1888 मध्ये खेळल्या गेलेल्या या कसोटी सामन्यात तब्बल 27 फलंदाज बाद झाले होते. केवळ दोन दिवसात संपलेला हा सामना ऑस्ट्रेलियाने 61 धावांनी जिंकला होता.