आपल्या शहरातील ताज्या बातम्या आणि ई-पेपर मिळवा मोफत

डाउनलोड करा

केसांचे आणि त्वचेचे सौंदर्य वाढवणारे नारळ 

2 वर्षांपूर्वी
  • कॉपी लिंक

सौंदर्याच्या दृष्टिकोनातून नारळाचे तेल फार उपयुक्त आहे. नारळाचे पाणी, ओल्या नारळाचा खोवलेला किस, नारळाचे दूध, सुके खोबरे, नारळाचे तेल, नारळाची कवटी हे सारे सौंदर्यवृद्धीसाठी फार महत्त्वाचे आहेत. त्याचा उपयोग करून अनेक नामांकित तारकाही आपली त्वचा तजेलदार ठेवतात. 


नारळात आहे काय ? 
- नारळामध्ये विविध एन्झाइम्स असतात. यात प्रामुख्याने एन्झाइम इन्व्हेस्टीन, ऑक्सिडेज आणि कॅटॅलेज यांचा समावेश करता येईल. - याशिवाय ओल्या नारळाच्या गरामध्ये प्रथिने, तेल आणि इतर काही इन ऑर्गेनिक तत्त्वे असतात. 
- नारळाच्या दुधामध्ये मॅनिटॉल नावाची साखर, डिंक, अल्ब्युमिन नावाची प्रथिने, टार्टारिक अॅसिड आणि पाणी असते. 
- नारळाच्या तेलामध्ये कॅप्रॉलिक अॅसिडशिवाय लॉरिक, मायरिस्टिक, पामिटिक, आणि स्टीयरिक आम्लाचे ग्लिसराइड्‍स असतात. 


नारळाचे पाणी 
नारळाच्या पाण्याविषयी एक अतिशय महत्त्वपूर्ण गोष्ट म्हणजे गर्भधारणेनंतर आठवड्यातून दोन-तीन वेळा नारळाचे पाणी नियमित ‍प्यायल्यास बाळाची कांती सुधारते आणि बाळाचा रंग उजळतो. ओले तसेच सुखे खोबरे शांतता देणारे, कामशक्ती वाढवणारे, पोट साफ होण्यास मदत करणारे, अर्थात बद्धकोष्ठतेचा नाश करणारे आहे. शिवाय टॉनिक म्हणूनही ते उपयुक्त आहे. त्यामुळे त्वचेचे आरोग्यही सुधारते. 


केसांसाठी नारळ 
केस तसेच सौंदर्यवर्धनासाठी नारळाचे पाणी अतिशय उपयुक्त आहे. केस धुण्यापूर्वी साधारण एक तास आधी नारळाचे पाणी केसांना आणि टाळूला चोळून लावावे. यामुळे केस मुलायम तर होतातच, शिवाय केसांच्या मुळांचे पोषण होऊन केस गळण्याचे प्रमाण कमी होते आणि केसांची वाढ व्हायला लागते. याशिवाय, त्वचा निर्मळ आणि नितळ राखण्यासाठीही नारळाच्या पाण्याचा उपयोग करता येतो. नारळाचे पाणी अतिशय पोषक आहे व ते त्वचेत शोषले गेल्यामुळे त्वचेला टवटवीतपणा येतो. यासाठी निस्तेज आणि कोरडी त्वचा असलेल्यांनी नारळाच्या पाण्यामध्ये दुधावरील थोडी साय मिसळून त्याने त्वचेला हळुवार हाताने मसाज करावा. याशिवाय नारळाचे पा‍णी व दूध त्वचेच्या क्लिंझिंगसाठीही उपयुक्त ठरतात. 


नारळाचे दूध 
- कोरड्या त्वचेचे पोषण करण्यासाठी नारळाचे दूध सर्वोत्तम ठरते. कोरडेपणामुळे जेव्हा त्वचा काळवंडलेली, निस्तेज आणि रखरखीत वाटायला लागते तेव्हा नियमित नारळाच्या दुधाने चेहऱ्याला मसाज केला तर त्वचा पुन्हा स्निग्ध तुकतुकीत आणि आभायुक्त दिसायला लागते. खरे पाहता त्वचेसाठी नारळाचे दूध म्हणजे एक वरदानच आहे. 
- याव्यतिरिक्त फेशियल मसाज करतानादेखील नारळाचे दूध क्रीममध्ये मिसळून वापरावे. असे केल्याने त्वचेवरील सुरकुत्यांचे प्रमाण कमी करण्यास मदत होते. 
- त्वचेप्रमाणेच केसांसाठीही नारळाचे दूध अतिशय पोषक आणि गुणकारी ठरते. टाळूची त्वचा आणि केस वाढत नसल्यास नारळाच्या दुधाचा उपयोग फायदेशीर ठरेल. नारळाच्या दुधामध्ये व्हिटॅमिन ईची गोळी फोडून घालावी व मिश्रणाने टाळूला हलक्या हाताने मसाज करावा. असे आठवड्यातून किमान दोनदा करावे. या प्रयोगाने निश्चितच केसांचे आणि टाळूच्या त्वचेचे आरोग्य सुधारेल. 


नारळाचे तेल 
आयुर्वेदानुसार नारळाचे तेल 'केश्य', अर्थात केसांचे आरोग्य वाढवणारे, केस गळणे थांबवणारे आणि केसांची वाढ करणारे आहे. बाजारात उपलब्ध असलेले नारळाचे तेल सुक्या खोबऱ्यापासून काढले जाते. मात्र, अायुर्वेदात नारळाचे तेल तयार करण्याची कृती पूर्णपणे वेगळी आहे. नारळाचे तेल ओल्या खोबऱ्यापासून तयार केले जाते. असे तेल तयार करण्यासाठी ओला नारळ बारीक वाटून घ्यावा आणि त्यापासून दूध काढून घ्यावे. हे दूध मंद आचेवर उकळत ठेवावे. यामुळे यातील पाण्याचा अंश उडून जाईल आणि निव्वळ तेल मागे उरेल. हे तेल गाळून घ्यावे. अशा पद्धतीने तयार केलेले तेल वापरल्यामुळे केस गळायचे थांबतात व केसांची वाढ व्हायला लागते. 
- केसांबरोबरच नारळाचे तेल त्वचेसाठीही उपयुक्त आहे. कोरड्या पडलेल्या अंगाला नारळाच्या तेलाने मसाज करावा. नारळाच्या तेलाचा वास उग्र वाटत असल्यास त्यात लव्हेंडर ऑइल आणि जिरेनियम ऑइलचे ४-५ थेंब मिसळून घ्यावेत. 

बातम्या आणखी आहेत...