फडणवीसांच्या 'वर्षा नाइट क्लब गँग'मध्येच रचला गेला लोकनेत्यांच्या पराभवाचा डाव -अनिल गोटे

2 वर्षांपूर्वी

कॉपी लिंक

लोकनेत्यांना पराभूत करण्यासाठी त्यांच्या स्थानिक विरोधकांना मोठे केले जायचे
पंकजा मुंडे, एकनाथ खडसेंच्या नाराजीला 'फडणवीस गँग' जबाबदार असल्याचा आरोप

मुंबई - महाराष्ट्र विधानसभा निवडणुकीत भाजपच्या लोकनेत्यांना पराभूत करण्याचा डाव वर्षा बंगल्यावरच रचण्यात आला होता असा आरोप अनिल गोटे यांनी केला आहे. त्यांनी फडणवीस आणि त्यांच्या अतिशय जवळच्या नेत्यांना 'वर्षा बंगला नाइट क्लब गँग' असे म्हटले आहे. विधानसभा निवडणुकी लोकनेत्या पंकजा मुंडे यांचा पराभव आणि एकनाथ खडसे यांच्या नाराजीला हीच गँग जबाबदार असल्याचे गोटे यांनी सांगितले आहे. उल्लेखनीय बाब म्हणजे, भाजपचे माजी आमदार अनिल गोटे यांनी नुकताच राष्ट्रवादी काँग्रेस पक्षात प्रवेश केला आहे.

लोकनेत्यांच्या परिसरातील विरोधकांना मजबूत करण्याचे रचले जायचे कट -गोटे

तत्कालीन मुख्यमंत्री देवेंद्र फडणवीस यांचे वर्षा निवासस्थान प्रत्यक्षात नाइट क्लब गँग होती. याच ठिकाणी षडयंत्र रचले जात होते. भाजपची राज्यात सत्ता असताना मंत्री राहिलेले गिरीश महाजन यांच्यासह इतर नेते येथे देवेंद्र फडणवीस यांच्या भेटी घेण्यासाठी येत होते. त्याच भेटींमध्ये लोकनेत्यांना पराभूत करण्याचे डाव रचले जात होते. भाजपच्या एखाद्या लोकप्रिय नेत्याला पराभूत करण्यासाठी त्यांच्याच भागातील विरोधी पक्षाच्या नेत्याला कसे मजबूत करता येईल यावर चर्चा केल्या जायच्या.
फडणवीस यांच्या वर्षा गँगने एकनाथ खडसे, पंकजा मुंडे, प्रकाश मेहता आणि राज पुरोहित यांच्यासह महत्वाच्या नेत्यांना बाजूला सारले. तसेच गँगचे मेंबर असलेल्या गिरीश महाजन, जयकुमार रावल, प्रसाद लाड, प्रविण दरेकर, राम कदम आणि इतरांना मोठे केले. वर्षा बंगल्यावर नेहमीच 10 वाजता त्यांच्या बैठका व्हायच्या. त्याचाच मी पण बळी ठरलो. याच कटकारस्थानांना कंटाळून मी भाजप सोडून शरद पवार यांच्या राष्ट्रवादी काँग्रेसमध्ये प्रवेश करण्याचा निर्णय घेतला आहे असा दावा गोटे यांनी केला.

पंकजा मुंडे यांनी परळीत सभा घेऊन कुणाचेही नाव न घेता भाजप आणि देवेंद्र फडणवीस यांचा खरपूस समाचार घेतला. तर एकनाथ खडसे यांनीही भाजपवर थेट नाराजी व्यक्त केली. खडसे यांनी जळगावात आपल्या कन्या रोहिणी आणि परळीत पंकजा मुंडेंच्या पराभवासाठी भाजपला जबाबदार धरले. कटकारस्थान करणाऱ्या भाजप नेत्यांची आपल्याकडे यादी सुद्धा असल्याचे खडसे यांनी सांगितले. विशेष म्हणजे, या सभेमध्ये भाजपचे प्रदेशाध्यक्ष चंद्रकांत पाटील सुद्धा उपस्थित होते. या सभेच्या अवघ्या दोन दिवसानंतर गोटे यांची ही प्रतिक्रिया समोर आली आहे. अनिल गोटे 2014 च्या विधानसभा निवडणुकीत धुळे येथून भाजपच्या तिकीटावर निवडून आले होते. विधानसभा निवडणुकीच्या पार्श्वभूमीवर त्यांना भाजपला सोडचिठ्ठी दिली आणि 12 डिसेंबर रोजी राष्ट्रवादीत प्रवेश केला.

बातम्या आणखी आहेत...