Home | Magazine | Madhurima | Doctor Shantanu Abhyankar write about 'Mother'

माता नच, तू वैरिणी

डॉ. शंतनू अभ्यंकर | Update - Feb 12, 2019, 11:14 AM IST

'मला नाही, तुम्ही आईला सांगा डॉक्टर! (आई कसली वैरीण आहे माझी वैरीण.)’

  • Doctor Shantanu Abhyankar write about 'Mother'

    बाळाला जन्म दिल्यानंतर बाईनं अमुक एक करू नये किंवा अमुक एक करावं याबाबत अनेक समजुती आहेत. त्यात काही तथ्य आहे का?

    'मला नाही, तुम्ही आईला सांगा डॉक्टर! (आई कसली वैरीण आहे माझी वैरीण.)’ कंसातलं वाक्यं मनातल्या मनात बोललेलं असतं. पण माझ्या सरावल्या कानांना स्पष्ट ऐकू येतं.


    माझ्या सगळ्या सूचना ऐकून घेऊन समोरची नवप्रसवा विनवत असते, ‘डॉक्टर, आईला सांगा प्लीज.’ तिच्या विनंतीला मान देऊन मी सांगतोसुद्धा. पण हे आई प्रकरण मॅनेज करणे अवघडच. कितीही सांगा, समजवा, शास्त्रीय माहिती द्या, या आपल्या हेका सोडायला तयार नसतात. तोंडावर हो म्हणतात आणि मग घरी गेल्यावर जे करायचं तेच करतात. त्या जे काही करतात ते प्रेमभरेच करतात. लेकीची आणि बाळाची आत्यंतिक काळजीच घेत असतात त्या. त्यांच्या हेतूबद्दल माझ्या मनात यत्किंचितही किंतू नाही. परंतु सदिच्छेच्या भांडवलावर किती आणि काय काय मारून नेणार?


    भर उन्हाळ्यात निव्वळ प्रसूती झाली म्हणून डोळ्यात बिब्ब्याचं काजळ, सर्वांगी तेल चोपडलेलं, दोन दोन स्वेटर, हातात ग्लोव्हज, पायात मोजे, कानाला फडकं बांधलेलं अशा अवतारातल्या केविलवाण्या, घामाघूम बायका वॉर्डात बघितल्या की कीव येते. कानाला बांधणे हे तर या बायकांचे व्यवच्छेदक लक्षण आहे. त्याशिवाय आपण डिलिव्हर झालोय असं फीलिंगच येत नाही बहुतेक. शिवाय दारे, खिडक्या, एसी, पंखा हे सगळं बंद आणि पाणी मागायचीही चोरी. कारण पाणी म्हणलं की, उकळून गार केलेलं, कोमट, मचूळ पाणी हजर. सेवेसी असलेली मंडळी हौसेहौसेनी थर्मास भरभरून पाणी घेऊन येतात. खरं तर पाणी शुद्ध, पिण्यायोग्य असणं महत्त्वाचं आहे. त्याचं तापमान हा जिच्यातिच्या आवडीचा भाग. हात धुवायला, पाय धुवायलासुद्धा गरमागरम पाणी. कारण गार पाण्यात हात घालायचा नाही. याबरोबर शेक-शेगडी, पोटपट्टा अशीही काही पीडातंत्रं आणि छळयंत्रं आहेत. भर उन्हाळ्यात रुंदच्या रुंद पोटपट्टा कसून वर रसरसते निखारे आणि त्यांचा धूर सहन करणाऱ्या बायका बाळंतपणातून तावून सुलाखून निघतात असंच म्हटलं पाहिजे. घाम फुटत असतो, पट्ट्याखाली खाजत असतं, पण नको म्हणायची काय बिशाद! जेव्हा हे सुखकर असेल तेव्हा हे सारं वापरायला कोणाचीच ना नाही, पण असह्य उकाड्यातही याचा आग्रह धरणे चुकीचे आहे, अनावश्यक आहे.


    गार हवा लागू नये म्हणून इतक्या कडक बंदोबस्ताची काही गरज नसते. आपल्यासारख्या विषुववृत्तीय हवामानात तर नाहीच नाही. तुम्हाला-आम्हाला जितका गारवा किंवा ऊब लागते तितकीच डिलिव्हरीच्या पेशंटलाही लागते. त्यांनी कम्फर्टेबल असणं महत्त्वाचं. पण लक्षात कोण घेतो? हे असले प्रकार यथासांग केले नाहीत तर आपण कमी पडलो, असं या बायांच्या आयांना वाटत असतं. येणारी-जाणारी प्रत्येक बाई आपल्या वकुबानुसार सूचना करत असते ते वेगळंच. त्यातून पूर्वी फक्त प्रत्यक्ष भेटीत सूचना शक्य होत्या. नापसंत सूचना कानाआड करता येत होत्या. आता मोबाइलवरून व्हिडिओ कॉल लावून सूचनांची अंमलबजावणी होत आहे वा नाही, याचा पडताळा चालू असतो. या सगळ्या भानगडीत ती नवजात आई मात्र पार गांजून गेलेली असते.


    पोटपट्ट्याचा असाच अनाठायी आग्रह चालतो. त्याने तुम्हाला बरं वाटत असेल, कमरेला आराम वाटत असेल तर जरूर वापरा, पण त्याचा जाच वाटत असेल तर तो न वापरण्याने काही बिघडत नाही. पोटपट्ट्याने म्हणे पोट सुटत नाही. काहीच्या काही! असं असतं तर ढेरपोट्या पुरुषांनी तत्काळ पोटं आत घालवली असती की. प्रसूतीनंतर पोट राहतं ते काय पोटात हवा गेल्याने नाही. हवा भरून पोट वाढायला पोट म्हणजे काय ट्रकचा टायर आहे? आणि मग असलं पोट सुई टोचून आत गेलं असतं की! पोट ओघळतं कारण, ‘बाळंतपण मानवलं पाहिजे’ या समजुतीपोटी आया आपल्या बाळंत कन्यांना खा खा खिलवतात. परिणामी वजन वाढतं. शिवाय गरोदरपणी पोटाचे स्नायू इतके ताणले जातात, इतके ताणले जातात की, ते तत्काळ मूळपदावर येऊच शकत नाहीत. एखादं इलॅस्टिक अति ताणलं तर ते जसं लेवाळं होतं तसं काही तरी होतं. स्नायूंची गेलेली ताकद आणि जोम परत मिळवण्यासाठी व्यायाम हाच उपाय आहे. पैसेवाल्या बायकांसाठी ‘टमी टक’ नावाचं एक ऑपरेशनही आहे. पोटच का, ओघळलेले गाल, स्तन, कुल्ले सगळं काही पुन्हा जिथल्या तिथे उचलून मिळतं. अशा ऑपरेशनला ‘मम्मी मेकओव्हर’ म्हणतात. कृत्रिम कायापालटच हा. झटपट विनाव्यायाम, विनाडाएट इलाज.


    बाळंतिणीच्या खाण्यावर तर हजारो निर्बंध. यांचं उल्लंघन केलं तर बाळाला शी होणार, पोटात दुखणार, अशी सतत भीतीची टांगती तलवार. त्यामुळे या बायका मन मारून मुकाट्याने पानात पडेल ते गिळतात. बहुधा पहिले काही दिवस इतर पदार्थ बंद. फक्त अळणी तूप-भात. मग नंतर मेथीची अळणी भाजी, बिन तिखटामिठाची आमटी असं काही तरी पानात पडतं. वर तोंडी लावायला ‘पोटभर का जेवली नाहीस?’ असा सवाल आहेच. असलं पथ्यपाणीही पाळायची गरज नसते. आईने भाकरी खाल्ली, गवार खाल्ली, असा अमुक पदार्थ खाल्यामुळे बाळाला तमुक त्रास होतो, असा कोणताही शोध नाही. इतक्या बेचव अन्नाला तोंड देणं कसं शक्य आहे. जर हे अन्न इतकं आवश्यक असेल तर सहानुभूती म्हणून घरच्या सगळ्यांनी बाळंतिणीबरोबर असाच आहार घ्यावा, अशी माझी सूचना आहे. पौष्टिक, भरपूर, चौरस आणि चविष्ट जेवण हवं.


    बस्स इतकंच.

Trending