Home | Maharashtra | Mumbai | Election2019:15 constituency have Maratha candidates

राज्यातील १५ मतदारसंघांमध्ये मराठा विरुद्ध मराठा थेट लढती

विनोद तळेकर | Update - Apr 17, 2019, 08:19 AM IST

मराठा फॅक्टर कितपत प्रभावी ठरणार याबाबत उत्सुकता

  • Election2019:15 constituency have Maratha candidates

    मुंबई- राज्यातील ४८ पैकी लोकसभा १५ मतदारसंघांत मराठा विरुद्ध मराठा, तर एका जागी कुणबी विरुद्ध कुणबी अशी थेट लढत असल्याने यंदाच्या निवडणुकीत ‘मराठा फॅक्टर’ कितपत प्रभावी ठरेल याबाबत उत्सुकता निर्माण झाली आहे. २ वर्षांपूर्वी मराठा मूक मोर्चाच्या माध्यमातून राजकीय भूमिका आणि पक्षभेद विसरून एक झालेला मराठा समाज यंदाच्या लोकसभा निवडणुकीत मात्र पुन्हा एकदा विविध गटांमध्ये विभागला गेला आहे. त्यातही लोकसभा निवडणुकांच्या पार्श्वभूमीवर पार पडलेल्या सकल मराठा समाजाच्या बैठकांमध्येही ठोस राजकीय भूमिका निश्चित न झाल्याने तूर्तास तरी मराठा समाजाचा कल स्पष्ट होऊ शकलेला नाही.


    राजकीय शक्तीचा उदय
    दोन वर्षांपूर्वी मराठा आरक्षणाच्या मागणीसाठी राज्यात ५० पेक्षा अधिक मूक मोर्चांचे शिस्तबद्ध आयोजन करून एका मोठ्या ‘राजकीय शक्ती’च्या रूपात मराठा समाज नव्याने राजकीय क्षितिजावर अवतरला होता. मराठा समाजाच्या या रेट्यापुढे नमते घेत राज्य सरकारनेही मोर्चेकऱ्यांच्या जवळपास सर्व मागण्या तत्त्वत: मान्य केल्या होत्या. यंदाच्या लोकसभा निवडणुकीत ‘मराठा फॅक्टर’ एकगठ्ठा प्रभावी ठरेल असा अंदाज त्या वेळी व्यक्त केला जात होता. मात्र सध्याची राजकीय स्थिती पाहता मराठा समाज कुणा एका पक्षाच्या पाठीशी एकगठ्ठा उभा असल्याचे दिसत नाही.


    ४२ मराठा, तर ६ कुणबी उमेदवार
    अपक्षांसह सर्वपक्षीय उमेदवारांच्या यादीवर नजर टाकली तर मराठा समाजाच्या उमेदवारांची एकूण संख्या ४२ आहे. मराठा समाजाची पोटजात मानल्या जाणाऱ्या कुणबी समाजाचे ६ उमेदवार निवडणुकीच्या रिंगणात आहेत.

    काँग्रेस महाआघाडीने १६ मराठा व ५ कुणबी, तर भाजप-सेनेच्या महायुतीने २३ मराठा व एका कुणबी उमेदवाराला तिकीट दिले आहे. याशिवाय अहमदनगरमधून संजीव भोर, औरंगाबादमधून हर्षवर्धन जाधव आणि रत्नागिरी-सिंधुदुर्गमधून नीलेश राणे हे ३ मराठा उमेदवार रिंगणात आहेत.

    १५ मतदारसंघांत मराठा विरुद्ध मराठा आणि एका मतदारसंघात कुणबी विरुद्ध कुणबी अशी थेट लढत असणार आहे. त्यामुळे मराठा मतांची विभागणी होणे अटळ आहे. ही बाब लक्षात घेता या निवडणुकीत तरी मराठा फॅक्टर एकगठ्ठा प्रभावी ठरण्याची शक्यता कमी असल्याचे दिसते.


    मराठा समाजाचे जनमत युतीविरोधात
    आरक्षण, शैक्षणिक योजना, कर्जमाफी, कोपर्डीच्या प्रकरणी नाराजीच्या मुद्द्यांवर मराठा समाजात अस्वस्थता आहे. त्यामुळे समाजाचे जनमत सत्ताधाऱ्यांच्या विरोधात आहे. त्यातच ‘प्रत्यक्षात चांगले नसतानाही, फक्त आम्ही चांगले वागतो, अशी जाहिरातबाजी करण्यातही हे सरकार पुढे’ असून त्याबाबतही संतापाची भावना आहे. त्याचा फायदा विरोधकांना किती होईल? हा प्रश्नच आहे.तरीही या निवडणुकीत मराठा समाज भोळेपणाने कोणत्याही आश्वासनाला भुलून मतदान करणार नाही हे निश्चित.
    - बाळासाहेब सराटे, मराठा आरक्षण अभ्यासक

    अजेंड्यावर मराठा समाज नाहीच
    मराठा समाज हा तटस्थ भूमिका असलेला, विशिष्ट नेत्याला मानणारा, पुरोगामी विचारसरणीचा व हिंदुत्ववादी विचारसरणी मानणारा मतदार अशा ४ गटांत विभागला आहे. सरकारनेही पूर्वसुरींच्या मार्गानेच आरक्षण देत फसवणूक केली, असे मानणारा मोठा वर्ग मराठा समाजात आहे. पण म्हणून तो थेट काँग्रेस-राष्ट्रवादीकडेच जाईल, असेही म्हणता येणार नाही. त्यामुळे सद्य:स्थितीचा विचार करता मराठा समाज या निवडणुकीत कोणत्याच पक्षाच्या अजेंड्यावर फारसा नव्हता.
    - राजेंद्र कोंढरे, मराठा महासंघ

    एकगठ्ठा मतपेढी तयार झाली नाही
    मराठा मूक मोर्चाच्या माध्यमातून एक प्रभावी राजकीय शक्ती म्हणून मराठा समाज नव्याने राजकीय क्षितिजावर अवतरला. मात्र, जाणीवपूर्वक या मोर्चांच्या माध्यमातून मराठा समाजाचे एक किंवा अनेकांच्या रूपाने प्रभावी नेतृत्व पुढे येऊ नये याची काळजी प्रस्थापितांनी घेतल्याने निवडणुकीच्या गणितात मात्र मराठा समाजाची एकगठ्ठा मतपेढी तयार होऊ शकली नाही. त्यामुळे सध्याच्या राजकीय स्थितीत नेमकी कुणाच्या मागे राजकीय शक्ती उभी करावी, या संभ्रमात मराठा मतदार असल्याचे दिसते.
    - शिवानंद भानुसे, संभाजी ब्रिगेड

Trending