आपल्या शहरातील ताज्या बातम्या आणि ई-पेपर मिळवा मोफत

डाउनलोड करा

प्रथमेश परब ‘टल्ली’ होऊन करणार समाज प्रबोधन, स्वतः केला खुलासा  

2 वर्षांपूर्वी
  • कॉपी लिंक

एंटरटेन्मेंट डेस्कः अभिनेता प्रथमेश परबने नुकतेच आपल्या आगामी सिनेमाचे टाइटल पोस्टर सोशल मीडियावरून रिव्हील केले आहे. झेब्रा एंटरटेन्मेंटच्या ‘टल्ली’ या 2020 ला रिलीज होणा-या सिनेमात प्रथमेश परब मुख्य भुमिकेत झळकणार आहे.  


आपल्या भूमिकेविषयी प्रथमेश म्हणतो, “माझ्या आजवरच्या विनोदी भूमिकांना आणि चित्रपटांना महाराष्ट्राच्या रसिक प्रेक्षकांनी उत्तम प्रतिसाद दिला. टल्ली सिनेमा जरी विनोदी असला, तरीही या सिनेमात विनोदाला समाज प्रबोधनाची झालर आहे. या सिनेमात पहिल्यांदाच माझी ओळख करून देताना नावाअगोदर ‘in & as’ प्रथमेश परब असे दिसेल. कोणत्याही अभिनेत्याच्या कारकिर्दीत अशी ओळख होणे, ही मानाची गोष्ट असते. या सिनेमात माझा लूकही वेगळा असणार आहे. सिनेमासाठी माझं फिजीकल ट्रेनिंगही लवकरच सुरू होईल.”

झेब्रा एंटरटेन्मेंट या प्रॉडक्शन हाऊसचे निर्माते संजय गोळपकर या विषयी म्हणाले, “आमच्या निर्मिती संस्थेची टल्ली ही पहिली फिल्म आहे. आणि नावाप्रमाणेच हा सिनेमा धमाल विनोदी चित्रपट असणार आहे. यात प्रथमेश परबचे नाव 'टल्ली' आहे. आता ज्याचे नावच 'टल्ली' असेल, अशा हिरोवर जेव्हा सिनेमा बनेल, तर तो किती विनोदी असेल, याची तुम्ही कल्पना करू शकता.” निर्माते संजय गोळपकर पूढे म्हणतात, “उतरंड या आमच्या लघुपटाला राष्ट्रीय आणि आंतरराष्ट्रीय पातळीवर अनेक पुरस्कार मिळाल्यावर कौटुंबिक कमर्शिअल सिनेमाची निर्मिती करायचे आम्ही ठरवले. प्रथमेश परब हा एक उत्तम अभिनेता आहे. त्याला विनोदाची चांगली जाण आहे. त्यामुळे या सिनेमातली मुख्य भूमिका तोच उत्तम प्रकारे वठवू शकेल, असा आम्हाला विश्वास आहे.”  'टल्ली'मधून संगीत दिग्दर्शक गणेश-सुरेश दिग्दर्शनात पहिलं पाऊल ठेवतायत. ते म्हणाले, “जरी सिनेमाचे नाव टल्ली असले तरीही, संपूर्ण कुटूंबाला एकत्र बसून पाहता येईल, असा हा निखळ मनोरंजक सिनेमा असेल. सध्या सिनेमाच्या प्री-प्रॉडक्शनचे काम सुरू आहे. लवकरच चित्रपटाचे शुटिंगही सुरू होईल. आणि पुढच्या वर्षी अभिनेता प्रथमेश परबसोबत मनोरंजनाची ही पर्वणी आम्ही घेऊन येऊ.”  झेब्रा एंटरटेन्मेंट निर्मित गणेश-सुरेश दिग्दर्शित 'टल्ली' सिनेमात प्रथमेश परब मुख्य भूमिकेत असून सिनेमाच्या इतर कलाकारांविषयीची लवकरच घोषणा होईल.