केकेआरमध्ये बदल:दिनेश कार्तिकने सोडले कोलकाता नाइट रायडर्सचे कर्णधारपद; आता 'या' विश्वकप विजेत्या खेळाडूकडे संघाची धुरा

आयपीएलच्या 13 व्या सत्राचा अर्धा टप्पा पूर्ण झाला आहे. यातच आता शाहरुख खानच्या कोलकाता नाइट रायडर्स संघात मोठा बदल करण्यात आला आहे. संघाचा विद्यमान कर्णधार दिनेश कार्तिक याने संघाचे कर्णधारपद सोडले आहे. आता संघाच्या कर्णधारपदी इयोन मोर्गन असणार आहे. कोलकाताने आपल्या ट्विटर हॅंडलवरुन याबाब माहिती दिली.

आपल्या फलंदाजीवर लक्ष केंद्रीत करण्यासाठी आणि संघाचा उद्देश पूर्ण करण्यासाठी दिनेशा कार्तिकने कर्णधारपद सोडल्याची माहिती आहे. दिनेश कार्तिकने आयपीएलच्या या मोसमात फक्त एकाच सामन्यात अर्धशतक केले आहे. परंतू, इतर सामन्यात त्याची कामगिरी चांगली राहिली नाही. सध्या, कोलकाता 7 पैकी 4 सामने जिंकून गुणतालिकेत चौथ्या क्रमांकावर आहे.

आज कोलकाता मुंबई आमने-सामने

आयपीएलच्या 13व्या सत्रातील 32 वा सामना आज मुंबई इंडियन्स आणि कोलकाता नाईट रायडर्स यांच्यात रंगणार आहे. आज मुंबईकडे सलग पाचवा विजय मिळवण्याची संधी आहे. मुंबईसमोर कोलकाता नेहमी दबावात खेळताना दिसतो. यापूर्वी दोन्ही संघात झालेल्या 10 सामन्या मुंबईने कोलकाताला 9 वेळा पराभूत केले आहे.