LSG च्या पराभवानंतर गौतम झाला गंभीर:म्हणाले- सामना संपण्यापूर्वीच आम्ही मानली हार; IPL आणि खेळांमध्ये दुर्बलांसाठी नाही जागा

IPL च्या 15 व्या मोसमात मंगळवारी लखनऊ सुपर जायंट्सला गुजरात टायटन्सकडून 62 धावांनी पराभव स्वीकारावा लागला. संघाच्या मानहानीकारक पराभवानंतर मार्गदर्शक गौतम गंभीर खेळाडूंच्या कामगिरीवर नाराज झाला होता. सामना संपल्यानंतर त्याने ड्रेसिंग रूममध्ये खेळाडूंशी संवाद साधला. सामन्यात गुजरातसमोर सहजपणे झालेल्या पराभवामुळे तो नाराज होता.

तो म्हणाला, 'आजची कामगिरी बघून असे वाटले की आम्ही लढलोच नाही. सामना संपण्यापूर्वीच आम्ही आमचा पराभव मान्य केला. सामन्यात विजय-पराजय असतो, पण पराभव स्वीकारणे चुकीचे आहे. खेळ आणि IPL मध्ये दुर्बलांना स्थान नाही. आम्ही या स्पर्धेत चांगला खेळ केला असून चांगल्या संघांना पराभूत केले आहे. मात्र आज संघात विजयाच्या उत्साहाचा अभाव होता.

तो पुढे म्हणाला की गुजरातने चांगली गोलंदाजी केली आणि आम्हालाही तशी अपेक्षा आहे, पण तुम्ही आंतरराष्ट्रीय गोलंदाजांविरुद्ध खेळत आहात आणि संघांनी आम्हाला आव्हाने द्यावीत अशी आमची इच्छा आहे. आम्हाला आव्हानांचा सामना करायचा आहे आणि म्हणूनच आम्ही सराव करतो.

गुजरातने लखनऊ समोर ठेवले होते 144 धावांचे आव्हान

नाणेफेक जिंकून प्रथम फलंदाजी करताना गुजरातने 20 षटकांत 4 गडी गमावून 144 धावा केल्या. शुभमन गिलने सर्वाधिक 63 धावांची खेळी खेळली. प्रत्युत्तरात लखनऊचा संघ 13.5 षटकांत 82 धावांवर गारद झाला. दीपक हुडाने सर्वाधिक 27 धावा केल्या. लेगस्पिनर राशिद खानने 4 बळी घेतले. यश दयाल आणि आर साई किशोर यांनी प्रत्येकी 2 गडी बाद केले.

प्लेऑफमध्ये पोहोचणारा गुजरात ठरला पहिला संघ

गुजरात प्ले-ऑफमध्ये पोहोचणारा पहिला संघ ठरला आहे. लीगमध्ये खेळल्या गेलेल्या 12 पैकी 9 सामने जिंकून गुजरातने 18 गुणांसह गुणतालिकेत अव्वल स्थान गाठले आहे. दुसरीकडे, लखनऊ 16 गुणांसह गुणतालिकेत दुसऱ्या स्थानावर आहे. लखनऊने 12 पैकी 8 सामने जिंकले.