हँडशेक का केला नाही?:IPLच्या पहिल्या सामन्यातील वर्तनामुळे हार्दिक पंड्या ट्रोल, स्टेजवर धोनीशी हस्तांदोलनच केले नाही

इंडियन प्रीमियर लीग (IPL) च्या 2023 हंगामातील पहिला सामना गुजरात टायटन्स आणि चेन्नई सुपर किंग्ज यांच्यात अहमदाबादच्या नरेंद्र मोदी स्टेडियमवर खेळण्यात आला. त्याआधी उद्घाटन समारंभात गतविजेत्या गुजरात टीमचा कर्णधार हार्दिक पंड्या ट्रॉफीसह स्टेजवर पोहोचला होता. स्टेजवर ट्रॉफी ठेवल्यानंतर हार्दिकने मंचावर उपस्थित सर्वांशी हस्तांदोलन केले, पण त्याने एक चूक केली ज्यासाठी त्याला ट्रोल केले जात आहे.

सोशल मीडियावर व्हायरल झालेल्या व्हिडिओमध्ये हार्दिक पांड्या स्टेजवर पोहोचल्याचे दिसत आहे. ट्रॉफी ठेवल्यानंतर हार्दिक थेट अरुण धुमाळ यांच्याकडे पोहोचतो. रांगेत आधी धोनी उभा असूनही हार्दिक त्याच्याशी हस्तांदोलन करत नाही. तो धोनीकडे पाहतोही, पण हात पुढे करत नाही. यानंतर हार्दिकने अनुक्रमे बीसीसीआय सचिव जय शहा, अध्यक्ष रॉजर बिन्नी, अभिनेत्री रश्मिका मंदान्ना, तमन्ना भाटिया आणि गायक अरिजित सिंग यांच्याशी हस्तांदोलन केले.

अभिनेत्री रश्मिका मंदाना, तमन्ना भाटिया आणि गायक अरिजित सिंग यांनी उद्घाटन सोहळ्यात धमाकेदार परफॉर्मन्स दिला. ट्रॉफीच्या अनावरणाच्या वेळी तेही मंचावर होते. चाहत्यांना हे थोडे विचित्र वाटत आहे, कारण 4 वेळचा चॅम्पियन कर्णधार धोनी आणि हार्दिक हे खूप जवळचे मानले जातात. हार्दिकही धोनीचा वाढदिवस साजरा करण्यासाठी त्याच्या घरीही गेलेला आहे. अनेकदा तो धोनीला आपला गुरू असल्याचे जाहीर म्हणालेला आहे. मग अशी चूक कशी झाली, असा सवाल चाहते विचारत आहेत.

दरम्यान, नाणेफेकीनंतर हार्दिक पंड्याने विरोधी संघाचा कर्णधार धोनीचे कौतुक केले. तो म्हणाला की धोनी हा सर्वांसाठी हिरो आहे. तो आपल्या सर्वांसाठी प्रेरणा आहे. एक खेळाडू म्हणून आम्ही त्याच्याकडून खूप काही शिकलो. या सामन्यात धोनीच्या संघाने प्रथम फलंदाजी करताना 7 विकेट गमावून 178 धावा केल्या, तर हार्दिक पांड्याच्या संघाने 5 विकेट गमावून 182 धावा करून विजय मिळवला.