गोलंदाजाच्या पायाने पडली बेल्स तरीही आउट:ललित यादव धावबाद झाला आणि पंत पंचांशी भिडला; जाणून घ्या, काय सांगतात नियम?

शनिवारी दिल्ली आणि गुजरात यांच्यात झालेल्या सामन्यात गुजरात संघाने शानदार खेळ दाखवत हा सामना 14 धावांनी जिंकला. दिल्लीचा संघ गुजरातने दिलेल्या लक्ष्याचा पाठलाग करताना रन आउटवरून एक वाद झाला.

दिल्ली कॅपिटल्सच्या डावाच्या 12व्या षटकात ऋषभ पंत आणि ललित यादव मैदानावर फलंदाजी करत होते. त्यानंतर विजय शंकरच्या षटकातील चौथ्या चेंडूवर दोन्ही फलंदाज धाव घेण्यासाठी धावले. दोघांमधील समन्वयात गडबड झाली आणि ललित यादव धावबाद झाला. त्यानंतर हा मोठा ड्रामा पाहायला मिळाला.

रिप्लेमध्ये असे दिसून आले की, थ्रो मिळाल्यानंतर विजय शंकरचा पाय विकेटला लागला आणि एक बेल्स पडली. यानंतर विजयने चेंडू कलेक्ट केला आणि दुसरी बेल्स उडवली. यावर दिल्लीचा कर्णधार पंत संतापला आणि त्याने पंचांना सांगितले की, शंकरने स्टंप काढावा, हे कसे आऊट आहे?

पंचांनी पंतला समजावले
वाढता वाद पाहून पंचांनी पंतला समजावले की, शंकरचा पाय विकेटला लागला तेव्हा फक्त एक बेल्स पडली होती आणि दुसरी विकेटवर होती. अशावेळी स्टंप काढण्याची गरज नाही आणि हे आउट मानले जाईल. ललित यादव 22 चेंडूत 25 धावा करून खेळत होता.

(क्रिकेटच्या नियमांनुसार, धावबाद होत असताना विकेटवर एकही बेल्स नसेल, तर चेंडू स्टंपला स्पर्श करून काढून टाकावा लागतो. याउलट, एक बेल्स स्टंपवर असेल तर तुम्ही आरामात रन आउट करू शकता.)