दिल्लीविरोधात धोनीचा स्ट्राईक रेट 200 पार:म्हणाला– संघातील माझी भूमिका स्पष्ट, जितके चेंडू मिळतील त्यावर मोठे फटके खेळायचे

चेन्नईच्या चेपॉक स्टेडियमवर चेन्नई सुपर किंग्ज (CSK) ने दिल्ली कॅपिटल्सचा (DC) 27 धावांनी पराभव करून त्यांना प्लेऑफच्या शर्यतीतून बाहेर काढले. विजयानंतर CSK कर्णधार एमएस धोनीने त्याच्या स्ट्राईक रेटवर विचारलेल्या प्रश्नाला उत्तर देताना सांगितले की, या हंगामात माझी भूमिका स्पष्ट आहे. मी खालच्या क्रमांकावर येईन आणि मला मिळालेल्या प्रत्येक चेंडूवर मोठा फटका खेळण्याचा प्रयत्न करेन. मी तेच करत आहे आणि त्याच विचाराने नेटमध्ये तयारी करत आहे. धोनी पुढे हसला आणि म्हणाला की सहकारी खेळाडूंनी मला यापुढे आणखी पळवावे अशी माझी इच्छा नाही.

धोनीची दिल्लीविरुद्ध 9 चेंडूत 22 धावांची खेळी

चेपॉक स्टेडियममध्ये फलंदाजीला आलेले चेन्नईचे बहुतांश फलंदाज वेगवान धावा काढण्यासाठी धडपडत होते. त्याच खेळपट्टीवर धोनीने 222.22 च्या स्ट्राईक रेटने धावा केल्या. त्याने 9 चेंडूत 22 धावा केल्या. समालोचकांचा असा विश्वास होता की धोनीच्या खेळीने चेन्नईला विजयी धावसंख्येपर्यंत पोहोचवले.

चेन्नईच्या संघाने 20 षटकांत 8 गडी गमावून 168 धावा केल्या. नंतर लक्ष्याचा पाठलाग करताना दिल्ली कॅपिटल्सला 8 विकेट गमावून 140 धावा करता आल्या आणि सामना 27 धावांनी गमवावा लागला.

या मोसमात धोनीचा स्ट्राईक रेट 200 च्या वर

धोनीने या मोसमात आठ डावांमध्ये 204.25 च्या स्ट्राईक रेटने धावा केल्या आहेत. या मोसमात त्याने आतापर्यंत 10 षटकार आणि 3 चौकार मारले आहेत. त्याचबरोबर त्याने 47 चेंडूत 96 धावा केल्या आहेत. तो या स्पर्धेत केवळ दोनदा बाद झाला आहे.

धोनीने आयपीएलमध्ये 136 च्या स्ट्राईक रेटने धावा केल्या

एमएस धोनीने आयपीएलमध्ये 245 सामन्यांमध्ये 136.47 च्या स्ट्राइक रेटने 5074 धावा केल्या आहेत. त्याची सर्वोत्तम कामगिरी 84 आहे. त्याने 24 अर्धशतके केली. त्याचबरोबर त्याने 349 चौकार आणि 239 षटकारही ठोकले आहेत.