IPL 2023:रोहित शर्मा बाद होता का? संजू सॅमसनच्या ग्लोव्हजमुळे स्टंप पडल्याची चर्चा, बॉल लागलाच नसल्याचा दावा

मुंबई इंडियन्स विरुद्ध राजस्थान रॉयल्स सामन्यात रोहित शर्मा बाद झाल्याने सोशल मीडियावर चर्चेचा विषय बनला आहे. सामन्याच्या दुसऱ्या डावातील दुसऱ्याच षटकात रोहित शर्माला संदीप शर्माने त्रिफळाचीत केले. रोहित लगेच मैदान सोडून निघून गेला. मात्र, रिप्ले पाहिल्यानंतर त्याचे बाद होणे संशयास्पद वाटले. याबाबत सोशल मीडियावर जोरदार चर्चा सुरू आहे.

मुंबई इंडियन्सने 213 धावांचे लक्ष्य ठेवले होते. डावाचे दुसरे षटक सुरू होते आणि रोहित शर्मा 4 चेंडूत 3 धावा काढून खेळत होता. त्यानंतर संदीप शर्माने त्याच्या ओव्हरच्या शेवटच्या चेंडूवर रोहितला बाद केले. चेंडू स्टंपला लागला आणि संजू सॅमसनच्या हातात गेला. इकडे अंपायरने लगेच बोट वर केले आणि रोहित शर्मा पॅव्हेलियनच्या दिशेने निघाला.

मात्र, रिप्ले पाहिल्यावर रोहित खरेच आऊट होता की नाही हे सांगणे कठीण होते. वास्तविक, संदीप शर्माचा चेंडू स्टंपला स्पर्श करत होता, पण त्याचवेळी संजू सॅमसनचे ग्लोव्हजही स्टंपला स्पर्श करत होते. अशा परिस्थितीत काही क्रिकेट चाहत्यांचे म्हणणे आहे की, चेंडू स्टंपला लागला पण बेल्स पडल्या नाहीत, तर या बेल्स संजू सॅमसनच्या ग्लोव्हजमुळे पडल्या, त्यामुळे रोहितला आऊट द्यायला नको होते. तर दुसरीकडे काही क्रिकेट चाहते असेही लिहित आहेत की, चेंडू स्टंपला लागलाच नाही, इथे संजू सॅमसनने रोहितला त्याच्या ग्लोव्हजने बाद केले.