बांगलादेशने T-20 मध्ये वर्ल्ड चॅम्पियन इंग्लंडचा केला पराभव:18 षटकांत 157 धावांचे गाठले लक्ष्य; सामनावीर शांतोची अर्धशतकी खेळी

बांगलादेश क्रिकेट संघाने T20 आणि वनडे विश्वविजेत्या इंग्लंडचा T-20 आंतरराष्ट्रीय सामन्यात 6 गडी राखून पराभव केला. चट्टोग्राममध्ये नाणेफेक गमावल्यानंतर प्रथम फलंदाजी करताना इंग्लंडने 20 षटकांत 6 गडी गमावून 156 धावा केल्या. प्रत्युत्तरात बांगलादेशने 18 षटकांत 4 गडी गमावून लक्ष्य गाठले.

बांगलादेशकडून नजमुल हुसेन शांतोने 51 धावांची खेळी केली. त्याचवेळी शाकिब अल हसन 34 अफिफ हुसैन 15 धावा करून नाबाद राहिला आणि आपल्या संघाचा विजय निश्चित केला.

बटलर-सॉल्टनंतर इंग्लिश संघाचा डाव गडगडला

नाणेफेक हारल्यानंतर प्रथम फलंदाजी करणाऱ्या इंग्लंड संघाला कर्णधार जोस बटलर आणि फिल सॉल्ट यांनी चांगली सुरुवात करून दिली. दोघांनी पहिल्या विकेटसाठी 10 षटकांत 80 धावा जोडल्या. सॉल्ट 38 धावा करून बाद झाला. तो गेल्यानंतर बटलर एका एंडला उभा होता मात्र दुसऱ्या बाजूला विकेट पडत राहिल्या.

बटलर 67 धावा करून बाद झाला. त्यांच्याशिवाय बेन डकेटने 20, डेव्हिड मलानने 4, सॅम करनने 6 आणि ख्रिस वोक्सने 1 धावा केल्या. मोईन अलीने नाबाद 8 तर ख्रिस जॉर्डनने 5 धावा केल्या. बांगलादेशकडून हसन मसमूदने सर्वाधिक 2 बळी घेतले. तर नसुम अहमद, तस्किन अहमद, मुस्तफिजुर रहमान आणि शाकिब अल हसन यांना प्रत्येकी एक विकेट मिळाली.

बांगलादेशची वेगवान सुरुवात

157 धावांच्या लक्ष्याचा पाठलाग करताना लिटन दास (12) आणि रॉनी तालुकदार (21) यांच्यामुळे बांगलादेशने दमदार सुरुवात केली. चौथ्या षटकात रॉनी आणि पाचव्या षटकात लिटन दास बाद झाला. तिसऱ्या क्रमांकावर खेळताना नजमुल हुसेन शांतो (51) याने तिसऱ्या विकेटसाठी टॉडी हृदयॉय (24) सोबत 39 चेंडूत 65 धावांची भागीदारी केली.

शांतो आणि हृदोय बाद झाल्यानंतर शाकिब आणि अफिफ यांनी 34 चेंडूत 46 धावांची नाबाद भागीदारी करत संघाला 12 चेंडू राखून विजय मिळवून दिला. इंग्लंडकडून जोफ्रा आर्चर, आदिल रशीद, मार्क वुड आणि मोईन अली यांनी 1-1 बळी घेतला. 51 धावा करणारा शांतो सामनावीर ठरला.

इंग्लंडवर प्रथमच T20 मध्ये विजय मिळवला

इंग्लंडचा पुरुष क्रिकेट संघ हा गतविजेता ODI आणि T20 वर्ल्ड चॅम्पियन आहे. वनडेमध्ये संघाचा पराभव केल्यानंतर बांगलादेशने आता टी-20मध्येही पराभव केला आहे. उभय देशांमधील ही पहिली टी-20 मालिका आहे. यापूर्वी 2021 च्या विश्वचषकात दोघांमध्ये एकमेव टी-20 सामना खेळला गेला होता, जो इंग्लंडने जिंकला होता.