शिवम मावीचा ड्रीम डेब्यू:पहिल्या T20 आंतरराष्ट्रीय सामन्यात 4 विकेट, पदार्पण करणाऱ्यांमध्ये तिसरा सर्वात यशस्वी गोलंदाज

श्रीलंकेविरुद्ध आपल्या करिअरच्या पहिल्या सामन्यात भारताचा वेगवान गोलंदाज शिवम मावीचे पदार्पण स्वप्नवत राहिले. त्याने अवघ्या 22 धावांत 4 बळी घेतले. यासह त्याने पदार्पणातच सर्वोत्तम गोलंदाजीच्या विक्रमावर आपले नाव नोंदवले. भारतासाठी सर्वाधिक यशस्वी पदार्पणाच्या बाबतीत मावी तिसऱ्या स्थानावर आहे. बरिंदर सरन (4/10) चे सर्वात यशस्वी पदार्पण आहे. यामध्ये भारताचा माजी फिरकी गोलंदाज प्रग्यान ओझा (4/21) दुसऱ्या क्रमांकावर आहे.

मावीने अशा घेतल्या विकेट
पहिली : सलामीवीर पथुम निसांका एका इन-स्विंगिंग फुलर लेन्थ बॉलवर बोल्ड झाला.
दुसरी : धनंजय डी सिल्वाला संजू सॅमसनकरवी झेलबाद केले.
तिसरी : वनिंदू हसरंगाने मिडऑफला उभ्या असलेल्या पांड्याकडे झेल दिला.
चौथी : महेश तीक्षणाला फुलर लेन्थ बॉल टाकला. ज्यावर तीक्षणाचा सूर्यकुमार यादवने लाँगऑफवर झेल घेतला.

निसांकाला बोल्ड करणे सर्वोत्तम विकेट - मावी
शिवम मावीने सामन्यानंतर सांगितले की, पहिल्याच षटकात या स्विंग बॉल्सने पथुम निसांकाला बोल्ड करणे ही त्याची सर्वोत्तम विकेट होती. सुरुवातीच्या 2 षटकात 2-2 चौकार खाल्ले. त्यानंतर पुढच्याच चेंडूवर विकेट मिळाली. हार्दिक पांड्या प्रत्येक चौकारानंतर मोटिव्हेट करत होता. हार्दिक म्हणत होता की फलंदाजाने चांगले शॉट्स खेळले आहेत. तुझ्या लाइनवर लक्ष केंद्रित करून बॉलिंग कर. मी तेच केले आणि विकेट्स मिळवल्या.

IPL मिनी लिलावात शिवम मावी 6 कोटींना विकला गेला. त्याला गुजरात टायटन्सने विकत घेतले. त्याने आयपीएल कारकिर्दीत 32 सामन्यात 30 विकेट घेतल्या आहेत.

आता या सामन्यातील इतर रेकॉर्ड पाहूया...

सूर्यकुमार यादवचा सर्वात कमी स्ट्राइक रेट
या सामन्यात सूर्यकुमार यादवने नवा विक्रम रचला. सूर्यकुमार यादवने आपल्या कारकिर्दीतील सर्वात कमी स्ट्राईक रेट टी-२० डावात नोंदवला. सूर्यकुमार यादवने 70 च्या स्ट्राइक रेटने 10 चेंडूत 7 धावा केल्या. 10 किंवा त्याहून अधिक चेंडू खेळल्यानंतर टी-20 आंतरराष्ट्रीय सामन्यांमध्ये हा त्याचा सर्वात कमी स्ट्राइक रेट आहे.

याआधी आशिया चषकात पाकिस्तानविरुद्ध सूर्यकुमारने 18 चेंडूत 100 च्या स्ट्राईक रेटने 100 धावा केल्या होत्या. श्रीलंकेविरुद्धच्या पुढच्याच सामन्यात सूर्याने 29 चेंडूत 117 धावांच्या स्ट्राईक रेटने 34 धावा केल्या. याशिवाय सूर्यकुमार जेव्हाही 10 किंवा त्याहून अधिक सामने खेळला तेव्हा त्याचा स्ट्राइक रेट 130 पेक्षा जास्त होता.

हार्दिकच्या नेतृत्वाखाली भारत अजिंक्य
हार्दिक पांड्याच्या नेतृत्वाखाली भारताने आतापर्यंत एकही सामना गमावलेला नाही. हार्दिकच्या नेतृत्वाखाली भारताने 6 सामने खेळले आहेत. यापैकी 5 सामने संघाने जिंकले तर एक सामना पावसामुळे बरोबरीत राहिला. श्रीलंकेविरुद्धच्या मालिकेत 2 सामने बाकी आहेत.

श्रीलंकेविरुद्ध घरच्या मैदानावर सलग सहाव्यांदा विजय
भारताने श्रीलंकेविरुद्ध सलग सहाव्यांदा घरच्या मैदानावर टी-20 आंतरराष्ट्रीय सामना जिंकला आहे. श्रीलंकेने भारताविरुद्ध एकूण 15 सामने खेळले, त्यापैकी भारताने 12 आणि श्रीलंकेने 2 सामने जिंकले. एक सामना अनिर्णित राहिला. 2016 मध्ये श्रीलंकेने टी-20 आंतरराष्ट्रीय सामन्यात भारताचा शेवटचा पराभव केला होता.

पहिल्या षटकात 17 धावा
नाणेफेक हरल्यानंतर प्रथम फलंदाजी करताना सलामीवीर इशान किशनने टीम इंडियाला धडाकेबाज सुरुवात करून दिली. इशानने पहिल्याच षटकात एक षटकार आणि 2 चौकार लगावले. त्याने ओव्हरमध्ये 16 धावा केल्या. षटकात वाईडसह 17 धावा आल्या.

2009 मध्ये टी-20 आंतरराष्ट्रीय सामन्याच्या पहिल्याच षटकात भारतासाठी सर्वाधिक धावा झाल्या होत्या. तेव्हा वीरेंद्र सेहवागने 19 धावा केल्या होत्या. 2018 मध्ये दक्षिण आफ्रिकेविरुद्धही संघाने 18 धावा केल्या आहेत. इशानने कसून रजिथाविरुद्ध 11 चेंडूत 27 धावा केल्या. उर्वरित गोलंदाजांसमोर तो 18 चेंडूत केवळ 10 धावा करू शकला.