दुसऱ्या कसोटीपूर्वी न्यूझीलंडला धक्का:कॅप्टन विल्यमसन कोरोना पॉझिटिव्ह, 5 दिवस आयसोलेशनमध्ये राहणार

नॉटिंघम येथे शुक्रवारपासून सुरू होत असलेल्या इंग्लंड-न्यूझीलंड मालिकेतील दुसऱ्या कसोटी सामन्यापूर्वी विश्वविजेत्या न्यूझीलंड संघाला मोठा धक्का बसला आहे. या पाच दिवसीय सामन्यापूर्वी किवी कर्णधार केन विल्यमसन कोरोना पॉझिटिव्ह आला आहे. यामुळे तो सामना खेळणार नाही.

31 वर्षीय केन विल्यमसन आता नियमांनुसार 5 दिवस आयसोलेशनमध्ये राहणार आहे. या सामन्यापूर्वी न्यूझीलंडचे प्रशिक्षक गॅरी स्टेड यांनी याची पुष्टी केली.

केन विल्यमसनला पहिल्या कसोटी सामन्यात फारशी कामगिरी करता आली नाही. त्याने पहिल्या डावात 2 आणि दुसऱ्या डावात 15 धावा केल्या होत्या.

रदरफोर्ड केनच्या जागी खेळणार, लॅथम कर्णधार असेल
व्यवस्थापनाने कर्णधार केन विल्यमसनच्या जागी हॅमिश रदरफोर्डचा समावेश केला आहे. त्याचबरोबर विल्यमसनच्या अनुपस्थितीत टॉम लॅथमकडे संघाचे कर्णधारपद सोपवण्यात आले आहे.

पहिल्या सामन्यात किवी संघाचा पराभव झाला होता
तीन सामन्यांच्या कसोटी मालिकेतील पहिल्या कसोटीत न्यूझीलंडला ५ विकेट्सनी पराभव स्वीकारावा लागला. या सामन्यात जो रूटने कसोटी कारकिर्दीतील २७ वे शतक झळकावले. या फॉरमॅटमध्ये 10,000 हून अधिक धावा करणारा तो दुसरा इंग्लिश फलंदाज ठरला. लॉर्ड्स कसोटीत पराभव पत्करावा लागल्यानंतर किवीज ०-१ ने पिछाडीवर आहेत.