चिंताजनक:विश्वचषकापूर्वी न्यूझीलंडला मोठा धक्का, दुखापतग्रस्त केन विल्यमसन वर्ल्ड कपमधून बाहेर पडण्याची शक्यता

आयपीएलच्या पहिल्या सामन्यात चेन्नई सुपर किंग्ज विरुद्ध गुजरात टायटन्सकडून खेळणारा केन विल्यमसन सीमारेषेवर क्षेत्ररक्षण करताना जखमी झाला होता. त्याच्या उजव्या गुडघ्याला दुखापत झाली होती. दुखापत इतकी गंभीर होती की त्याला सपोर्ट स्टाफच्या मदतीने मैदानाबाहेर जावे लागले. त्याचवेळी, या दुखापतीनंतर, न्यूझीलंड क्रिकेट बोर्डाने पुष्टी केली आहे की, त्याचे क्रूसिएट लिगामेंट तुटले आहे आणि त्यातून बरे होण्यासाठी त्याला शस्त्रक्रियेची आवश्यकता आहे. तसेच त्याच्या या ुखापतीच्या काळात न्यूझीलंड संघासाठी एक वाईट बातमी समोर येत आहे. वास्तविक, या दुखापतीमुळे न्यूझीलंडचा दिग्गज फलंदाज 2023 च्या एकदिवसीय विश्वचषकातूनही बाहेर जाऊ शकतो.

केन विल्यमसन विश्वचषक 2023 मधून बाहेर पडण्याची शक्यता

केन विल्यमसनची दुखापत आणि त्याची शस्त्रक्रिया पाहता तो 2023 च्या विश्वचषकातून बाहेर जाऊ शकतो, असे आता मानले जात आहे. 5 ऑक्टोबर ते 19 नोव्हेंबर दरम्यान भारतात वर्ल्ड कप होणार आहे. दुसरीकडे, पुढील तीन आठवड्यांत केन यांच्या गुडघ्यावर शस्त्रक्रिया होण्याची शक्यता आहे. अशा स्थितीत शस्त्रक्रियेनंतर इतक्या कमी वेळेत बरे होणे फार कठीण असते. हे पाहता तो 2023 च्या विश्वचषकाच्या निवडलेल्या संघाचा भाग नसल्याची माहिती समोर आली आहे.

दुखापतीनंतर केन विल्यमसनचे मोठे वक्तव्य

दुखापतीनंतर न्यूझीलंडचा दिग्गज खेळाडू केन विल्यमसनने मोठे वक्तव्य केले आहे. केन म्हणाला की, 'गेल्या काही दिवसांत मला खूप पाठिंबा मिळाला आहे आणि त्यासाठी मी गुजरात टायटन्स आणि न्यूझीलंड क्रिकेट या दोघांचे आभार मानू इच्छितो. साहजिकच अशी दुखापत होणे निराशाजनक आहे, परंतु माझे लक्ष आता शस्त्रक्रिया करण्यावर आहे. यास थोडा वेळ लागणार आहे, पण मी लवकरात लवकर मैदानात उतरण्यासाठी शक्य ते सर्व प्रयत्न करेन.’