पॅट कमिन्सच्या आईचे निधन:अहमदाबाद कसोटीच्या दुसऱ्या दिवशी ऑस्ट्रेलियाचा संघ काळी पट्टी बांधून मैदानात उतरला

ऑस्ट्रेलिया संघाचा नियमित कर्णधार पॅट कमिन्सच्या आईचे निधन झाले. त्याची आई अनेक दिवसांपासून आजारी होती. त्यांना स्तनाचा कर्करोग झाला होता. गेल्या काही दिवसांपासून त्या पॅलिएटिव्ह केअरमध्ये होत्या. या कारणास्तव पॅट कमिन्स भारत दौरा अर्धवट सोडून ऑस्ट्रेलियाला परतला. दुसऱ्या कसोटीनंतर तो आईकडे परतला.

क्रिकेट ऑस्ट्रेलियाने दिली ही माहिती

क्रिकेट ऑस्ट्रेलियाने शुक्रवारी सकाळी सोशल मीडियावर चाहत्यांसोबत ही दुःखद बातमी शेअर केली. क्रिकेट ऑस्ट्रेलियाने आपल्या पोस्टमध्ये लिहिले आहे की, मारिया कमिन्सच्या निधनाने आम्हाला खूप दुःख झाले आहे. क्रिकेट ऑस्ट्रेलियाच्या वतीने, आम्ही पॅट कमिन्सच्या कुटुंबीयांना आणि मित्रांना मनापासून शोक व्यक्त करतो. ऑस्ट्रेलियन पुरूष संघ आज आदरार्थी काळ्या हातपट्ट्या घालून मैदानात उतरेल. त्याचवेळी संघातील खेळाडूंना माहिती देण्यासाठी संघाच्या प्रशिक्षकाने सामना सुरू होण्यापूर्वी खेळाडूंना मैदानात एकत्र केले.

BCCI ने ही व्यक्त केला शोक

पॅट कमिन्सच्या आईच्या निधनाबद्दल भारतीय क्रिकेट नियामक मंडळानेही शोक व्यक्त केला आहे.BCCIने आपल्या पोस्टमध्ये लिहिले आहे की, या दुःखाच्या वेळी आमच्या प्रार्थना त्यांच्या आणि त्यांच्या कुटुंबासोबत आहेत.

पॅट कमिन्सच्या अनुपस्थितीत स्टीव्ह स्मिथ कर्णधार

पॅट कमिन्सच्या अनुपस्थितीत स्टीव्ह स्मिथ ऑस्ट्रेलियन संघाचे नेतृत्व करत आहे. आईच्या प्रकृती अस्वास्थ्यामुळे पॅट कमिन्स दिल्ली कसोटीनंतर मायदेशी परतला. तिसऱ्या कसोटीपूर्वी तो पुनरागमन करेल, अशी अपेक्षा होती.

पण पॅट कमिन्स आईच्या प्रकृती अस्वास्थ्यामुळे तिसऱ्या कसोटीत पुनरागमन करू शकला नाही. या कसोटीत ऑस्ट्रेलियाने भारताचा पराभव केला. त्याचवेळी अहमदाबाद येथे खेळल्या जात असलेल्या चौथ्या कसोटीत स्टीव्ह स्मिथ संघाचे नेतृत्व करत आहे. या कसोटीच्या पहिल्या दिवशी ऑस्ट्रेलियाचे पंतप्रधान आणि भारताचे पंतप्रधानही अहमदाबादला पोहोचले होते.