टेनिस:गत फ्रेंच ओपननंतर प्रथमच क्ले कोर्टवर खेळणाऱ्या ज्वेरेवची सलग सेटमध्ये बाजी

जर्मन टेनिसपटू अलेक्झांडर ज्वेरेवने माँटे कार्लो मास्टर्स स्पर्धेत सलग सामने जिंकून आत्मविश्वास परत मिळवण्याच्या तयारीत आहे. स्पर्धेतील १३ व्या मानांकित ज्वेरेवने दुसऱ्या फेरीत स्पेनच्या रॉबर्टो बतिस्ता अगुटचा ६-४, ६-४ असा सरळ सेटमध्ये पराभव करत तिसरी फेरी गाठली. गेल्या वर्षीच्या फ्रेंच ओपननंतरची ही त्याची पहिली क्ले कोर्ट स्पर्धा आहे. ज्वेरेवने पहिल्या सेटमध्येच अगुटची सर्व्हिस मोडली आणि ३-२ अशी आघाडी घेतली होती. तिसऱ्या फेरीत त्याचा सामना डॅनियल मेदवेदेव आणि लोरेंझो सोनेगो यांच्यातील विजेत्याशी होणार आहे. दरम्यान, चौथ्या मानांकित नॉर्वेच्या कॅस्पर रूडने नेदरलँड्सच्या बोटिच व्हॅन डी गेंडस्कल्पला ७-५, ७-६ ने हरवले. रूडचा सामना आता जर्मनीच्या जॅन लेनार्ड स्ट्रफशी होणार आहे.